ՌԴ-ի՝ հացահատիկային գործարքից դուրս գալուց հետո երեք օտարերկրյա նավ է մտել ուկրաինական նավահանգիստ

Հունական, իսրայելական և թուրք-վրացական ընկերություններին պատկանող երեք բեռնատար նավեր հուլիսի 30-ին ժամանել են Դանուբի դելտայի Իզմայիլի նավահանգստի ուկրաինական հացահատիկի տերմինալներից մեկը։ Այս մասին հայտնում է Forbes-ը, որին վկայակոչում է Meduza-ն։

«Ազատություն» ռադիոկայանը և ուկրաինական «Страна»-ն նշում են, որ դրանք առաջին արտասահմանյան նավերն են, որոնք ժամանել են ուկրաինական նավահանգիստներ այն բանից հետո, երբ Ռուսաստանը դուրս է եկել հացահատիկային գործարքից:

Ըստ լրատվամիջոցի՝ հունական և իսրայելական նավերը շարժվել են Բոսֆորից Իզմայիլի նավահանգիստ, իսկ թուրք-վրացական նավը՝ հյուսիսային Թուրքիայից։ Նրանց երթուղուն հետևել են ՆԱՏՕ-ի երեք հետախուզական ինքնաթիռներ և մեկ անօդաչու թռչող սարք։

Նշվում է, որ ժամանած նավերն ուկրաինական նավահանգստում հացահատիկ են բեռնելու, որից հետո վերադառնալու են նույն երթուղով։ Լրատվամիջոցները գրում են, որ Դանուբի նավահանգիստները գյուղատնտեսական ապրանքների մատակարարման համար օգտագործվել են նաև մինչև հացահատիկի գործարքը, սակայն դրանց թողունակությունը համեմատելի չէ ծովային նավահանգիստների հետ:

Հավելենք, որ հացահատիկային գործարքի ժամկետը լրացել է հուլիսի 17-ին, և Մոսկվան հրաժարվել է երկարաձգել այն։  Սևծովյան  հացահատիկային գործարքը կնքվել է 2022 թվականի հուլիսի 22-ին ՄԱԿ-ի, Թուրքիայի, ՌԴ-ի և Ուկրաինայի միջև՝ Սև ծովի Ուկրաինայի նավահանգիստներով ուկրաինական հացահատիկի անվտանգ արտահանման համար։ Ստորագրումից ի վեր գործարքը մի քանի անգամ երկարաձգվել է։

Էմմա Չոբանյան