Միջազգային ապրանքահումքային շուկայում գները նվազում են․ գնաճային միջավայրը շարունակում է մեղմվել․ ԿԲ․ ՏԵՍԱՆՅՈՒԹ

2023 թ. օգոստոսի 1-ի նիստում Կենտրոնական բանկի (ԿԲ) խորհուրդը որոշեց վերաֆինանսավորման տոկոսադրույքը նվազեցնել 0.25 տոկոսային կետով՝ սահմանելով 10.25%: 2023 թ. հունիսին 12-ամսյա գնաճը շարունակել է արագորեն նվազել եւ կազմել է -0.5%: 12-ամսյա բնականոն գնաճը նույնպես զգալիորեն դանդաղել է՝ կազմելով 1.5%: 2023 թ. երկրորդ եռամսյակում համաշխարհային տնտեսությունում պահպանվել է ցածր տնտեսական ակտիվությունը, եւ 12-ամսյա գնաճը շարունակել է նվազել։ Լրագրողների հետ հանդիպմանն այս մասին հայտարարեց ՀՀ ԿԲ ​նախագահի տեղակալ Արմեն Նուրբեկյանը։

«Այդուհանդերձ, գործընկեր բոլոր երկրներում, աշխատաշուկաներից ածանցվող գնաճային ճնշումների պահպանման պայմաններում, կոշտ գներով աչքի ընկնող ապրանքների եւ ծառայությունների գները դեռեւս մնում են բարձր: Ուստի, գործընկեր երկրների կենտրոնական բանկերն առաջիկայում կշարունակեն վարել զսպող դրամավարկային քաղաքականություն: Ֆինանսական խիստ պայմանների ներքո միջազգային ապրանքահումքային շուկաներում գները նվազում են: Արդյունքում՝ արտաքին հատվածից ՀՀ տնտեսության վրա գնաճային ազդեցությունները շարունակում են թուլանալ:

2023 թ. երկրորդ եռամսյակում ՀՀ-ում արձանագրվել է սպասվածից բարձր տնտեսական ակտիվություն, որին շարունակել են նպաստել շինարարության եւ ծառայությունների ոլորտներում արձանագրված բարձր աճերը: Կապիտալի, աշխատուժի եւ զբոսաշրջության մեծ ներհոսքի պայմաններում պահպանվող արտաքին բարձր պահանջարկը եւ տնտեսությունում եկամուտների ավելացումը նպաստել են պահանջարկի ընդլայնմանը: Արտաքին հատվածից գնաճային ազդեցության էական թուլացման, իրականացված զսպող դրամավարկային քաղաքականության եւ դրամի արժեւորման արդյունքում գնաճային միջավայրը ՀՀ-ում շարունակում է արագ տեմպով մեղմվել: Այնուամենայնիվ, բարձր պահանջարկի եւ գնաճային սպասումների պայմաններում ծառայությունների եւ որոշ ապրանքների գնաճը ճշգրտվում է համեմատաբար դանդաղ տեմպերով»,- հայտնեց ՀՀ ԿԲ ​նախագահի տեղակալը։

Մանրամասները՝ տեսանյութում։