Նիկոլ Փաշինյանի գործողություններին գնահատական տալը կոռեկտ չէ. Դավիթ Տոնոյան․ ՏԵՍԱՆՅՈՒԹ

Կոռեկտ չեմ համարում, որ գնահատական տամ վարչապետի աշխատանքին։ ՀՀ ԱԺ 44-օրյա պատերազմի հանգամանքներն ուսումնասիրող քննիչ հանձնաժողովի նիստում այս մասին նշեց պաշտպանության նախկին նախարար Դավիթ Տոնոյանը՝ խուսափելով պատերազմի ժամանակ վարչապետ Նիկոլ Փաշինյանի գործողություններին գնահատական տալուց։

Տոնոյանի խոսքով՝ դա պետք է անի 44-օրյա պատերազմի հանգամանքներն ուսումնասիրող քննիչ հանձնաժողովը։

«Այս հանձնաժողովը պետք է տա, ոչ թե ես, որ եղել եմ իր ենթական։ Ինչպես ասացի, շատ ճգնաժամային իրավիճակում, փաստորեն, կտրված եմ եղել և ավելի շատ մարտավարական խնդիրներ եմ լուծել։ Դրա համար, կոռեկտ չէ իմ կողմից, որպես պաշտպանության նախկին նախարար, գնահատականներ տալ վարչապետի գործողություններին։ Ինձ թվում է, որ դա ձեր գործառույթն է»,-նշեց նա։

Պատգամավոր Հայկ Սարգսյանը հետաքրքրվեց, թե  եղե՞լ է մի խնդիր, որ դրվել է վարչապետի դիմաց ու նա չի աջակցել դրան. «Խնդրում եմ հստակ պատասխանեք, կապ չունի, թե քաղաքական թիմը ով է ներկայացնում։ Դուք էլ եք եղել մեր քաղաքական թիմի անդամ, բայց մենք այսօր անկաշկանդ Ձեզ հարցեր ենք տալիս»։

«Պարո՛ն Սարգսյան,  ինչպես ասել է պարոն Փաշինյանը, ցավոք կամ բարեբախտաբար ես եղել եմ կառավարության անդամ և այդ ընթացքում չեմ մտածել, որ վարչապետը չի վստահում ինձ։ Ես քաղաքական թիմի անդամ չեմ եղել, քանի որ քաղաքական այն որոշումներին, որոնք կուսակցական բնույթի էին, ես չեմ մասնակցել։ Հիմա ձեր նախարարը քաղաքական թիմի անդամ է։ Ես որպես կառավարության անդամ ՀՀ վարչապետի առջև անիրատեսական  հարցեր չեմ բարձրացրել և իմ բարձրացրած հարցերն ունեցել են հստակ պատասխաններ և լուծումներ, ես աշխատել եմ վստահության մթնոլորտում, բայց միևնույն ժամանակ չեմ ընդունում այն մոտեցումը, որ բանակն ինչ ուզել է, տվել են, որովհետև ես այդպես չէի ձևակերպի։ Կառավարությունն իրականացրել է իր գործառույթը»,- նշեց Տոնոյանը և վստահեցրեց, որ ՊՆ–ն ու ինքն անձամբ` որպես նախարար, կատարել է իր գործառույթը, իսկ վարչապետի կողմից չի ունեցել որևէ խոչընդոտ այդ գործառույթն իրականացնելու ընթացքում։

Մանրամասները՝ տեսանյութում։