Ո՞րն է ծանր կամ առանձնապես ծանր հանցագործությունների դեպքում գործուն զղջալու ինստիտուտի նպատակը. ՏԵՍԱՆՅՈՒԹ

Քաղաքացիական հասարակության կազմակերպությունները նամակով դիմել են ՀՀ նախագահ Վահագն Խաչատուրյանին՝ կոչ անելով չստորագրել ԱԺ-ի ընդունած՝ ծանր և առանձնապես ծանր հանցագործությունների կատարման մեջ մեղադրվող անձանց համար գործուն զղջալու հիմքով քրեական պատասխանատվությունից ազատելու հնարավորություն նախատեսող օրենքը։

Նշենք, որ Հուլիսի 11-ին և 12-ին Ազգային ժողովն արտահերթ նստաշրջանի շրջանակներում արտահերթ կարգով առաջին և երկրորդ ընթերցմամբ ամբողջությամբ ընդունել է ՀՀ քրեական օրենսգրքում լրացումներ կատարելու մասին ՀՀ օրենքի նախագիծը, որով ՀՀ քրեական օրենսգրքի 81-րդ հոդվածը լրացվել է նոր մասերով՝ գործուն զղջալու հիմքով քրեական պատասխանատվությունից ազատելու հնարավորություն նախատեսելով նաև առաջին անգամ ծանր և առանձնապես ծանր հանցագործությունների կատարման մեջ մեղադրվող անձանց համար:

Մեդիա կենտրոնում այսօր ընթանում է  քննարկում՝ «Քրեական պատասխանատվությունից ազատե՞լ ծանր կամ առանձնապես ծանր հանցագործության համար մեղադրվողներին» թեմայով։

Բանախոսներն են՝ ՀՔԱՎ գրասենյակի նախագահ Արթուր Սաքունցը, «Իրավունքների պաշտպանություն առանց սահմանների» ՀԿ փորձագետ Անահիտ Մկրտչյանը, քրեական գործերով փաստաբան, Իրավունքի զարգացման և պաշտպանության hիմնադրամի իրավական հարցերով փորձագետ Դավիթ Գյուրջյանը, ՀՀ ԱՆ Քրեական օրենսդրության, քրեակատարողական և պրոբացիայի ոլորտի քաղաքականության մշակման վարչության Քրեական և քրեադատավարական օրենսդրության մշակման բաժնի պետ Արփի Լազարյանը։

Լազարյանը ներկայացրեց նախագիծը, պարզաբանեց, թե որն է ծանր կամ առանձնապես ծանր հանցագործությունների դեպքում գործուն զղջալու ինստիտուտի նպատակը։

«Երեք նոր կետեր են ավելացվել, որոնցով սահմանվում է, որ ծանր և առանձնապես ծանր հանցագործություն կատարած անձինք, եթե առաջին անգամ են նման հանցանք գործել, որոշակի պայմանների առկայության դեպքում կարող են ազատվել քրեական պատասխանավությունից։

Նախատեսված են կոնկրետ հանցակազմերը և կոնկրետ դեպքերը, երբ անձի նկատմամբ չի կարող կիրառվել գործուն զղջալու հիմքով պատասխանատվությունից ազատումը։ Դա պայմանավորված է հանցագործների բարձր հանրային վտանգավորությամբ, ինչպես նաև ՀՀ ստանձնած միջազգային պարտավորություններով»,- նշեց Արփի Լազարյանը։

Մանրամասները՝ տեսանյութում։