էս հարցերը նոր քրեական գործի շրջանակո՞ւմ են. Տոնոյանը՝ Դավիթ Գալստյանին առնչվող հարցերին ի պատասխան․ ՏԵՍԱՆՅՈՒԹ

2020թ․ սեպտեմբերին պաշտպանության նախարարությունում ինչ պաշտոն է զբաղեցրել Դավիթ Գալստյանը` «Պատրոն Դավոն»։ Այսօր՝ օգոստոսի 1-ին, ԱԺ 44-օրյա պատերազմի հանգամանքներն ուսումնասիրող քննիչ հանձնաժողովի նիստի ժամանակ, անդրադառնալով այս հարցին, պաշտպանության նախկին նախարար Դավիթ Տոնոյանը նշեց․ «Իմ խորհրդականը չի եղել, բայց պատերազմի օրերին, ես չգիտեի` դա 44 օր է տևելու, ինչքան է տևելու, նա եղել է այն անձը, ով ուներ բավարար հմտություններ և կարողություններ ՀՀ սպառազինության մատակարարումներ կազմակերպելու համար, ինչը և իրականացրել է»։

Տոնոյանի խոսքով` սպառազինության մատակարարման առումով արվել է գրեթե անհնարինը։ Պաշտպանության նախկին նախարարը հավելեց, որ սպառազինությունը բերվել է ինչպես օդային ճանապարհով, այնպես էլ ցամաքային` ՀՀ–ում հայտնվելով, բառիս բուն իմաստով, «աճպարարության արդյունքում»։

Անդրադառնալով հարցին, թե ինչ գործ ուներ Դավիթ Գալստյանն իր հետո Արցախում` Արցախի պաշտպանության բանակի հրամանատարական կետի մարտական կառավարման կենտրոնում, Տոնոյանը պատասխանեց, որ Դավիթ Գալստյանը երբևէ չի մասնակցել որոշումների կայացմանը և ներկա չի եղել քննարկումներին։

էս հարցերը նոր քրեական գործի շրջանակո՞ւմ են,- հետաքրքրվեց Տոնոյանը՝ Դավիթ Գալստյանին առնչվող հարցերին ի պատասխան։
«Ես 3 ամիսը մեկ կրկնում եմ, թե ինչպիսի հարաբերությունների մեջ եմ եղել Դավիթ Գալստյանի հետ, կարծում այստեղ դրան անդրադառնալու անհրաժեշտություն չկա, բայց ես նորից կրկնում եմ, որ այն հպարտությունը, որով մենք նշում ենք 600 միլիարդի զենքի վերաբերյալ, մի ստվար մասը բերվել է Հայաստան այդ անձի կողմից:

Խնդրում եմ հաշվի առնել, որ պատերազմի սկսվելու ժամանակ չէ, որ մեր մատակարարուման ուղիները եղել են զմռսված, բավական մեծ դժվարություններ եղել են նաև պատերազմական գործողություններին նախորդող շրջանում»,- նշեց Տոնոյանը։

Մանրամասները՝ տեսանյութում։