15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
ԱՄՆ Պետքարտուղարությունն արձագանքել է Վրաստան-Չինաստան ռազմավարական գործընկերությանը
Քաղաքականություն
01.08.2023 | 21:46
ԱՄՆ Պետքարտուղարությունը հայտարարել է, որ կշարունակի հետևել Վրաստանի և Չինաստանի միջև ռազմավարական գործընկերության հաստատմանն ուղղված հետագա քայլերին և ցանկանում է համոզվել, որ «այդ գործողություններն իրականացվում են թափանցիկ ձևով և օրենքի գերակայությանը համապատասխան», փոխանցում է Գրուզիա օնլայնը:
«Մենք այլ երկրի, այդ թվում՝ Չինաստանի ներդրումների կամ մասնակցության դեմ ոչինչ չունենք։ Մեր մտահոգությունն այն է, որ պետք է համոզվենք, որ այդ գործողություններն իրականացվում են թափանցիկ և օրենքի գերակայությանը համապատասխան՝ կայուն ֆինանսավորմամբ և շահառուների ինքնավարության հարգմամբ, որպեսզի քաղաքական վերապահումներ չլինեն։ Վերջին հաշվով, երկրները կկայացնեն իրենց ինքնիշխան որոշումներն այն մասին, թե ում հետ են ցանկանում բիզնես վարել կամ ներդրումներ կատարել: Չինաստանի Ժողովրդական Հանրապետությունը դիվանագիտական ճանաչման դիմաց հաճախ է տալիս խոստումներ, որոնք, ի վերջո, անկատար են մնում: Մենք կշարունակենք ուշադիր հետևել հետագա քայլերին»,- ասվում է ԱՄՆ Պետքարտուղարության հայտարարության մեջ:
Հիշեցնենք, որ Վրաստանի և Չինաստանի միջև ռազմավարական գործընկերության համաձայնագիրը ստորագրվել է Վրաստանի վարչապետ Իրակլի Ղարիբաշվիլիի՝ հուլիսի 26-ից օգոստոսի 1-ը Չինաստան կատարած այցի ընթացքում։
