14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Սեպտեմբերից շինհրապարակներում լրացուցիչ սարքավորումներ պետք է տեղադրվեն քաղաքը շինարարական փոշուց պաշտպանելու համար
Հասարակություն
31.07.2023 | 17:22
Սեպտեմբերից ուժի մեջ կմտնի շինարարական հրապարակներում լրացուցիչ սարքավորումներ տեղադրելու նորմերի վերաբերյալ ավագանու որոշումը: Այս մասին տեղեկացնում է Երևանի քաղաքապետարանը։
Ոլորտի խնդիրների և նոր կարգավորումների վերաբերյալ Երևանի քաղաքապետարանում անցկացվել է հանդիպում-քննարկում «Կառուցապատողների հայկական ասոցիացիա» ՀԿ-ի անդամների և կառուցապատող այլ ընկերությունների հետ:
Երևանի քաղաքապետարանի քաղաքաշինության և հողի վերահսկողության վարչության պետ Յակով Ասատրյանը, կարևորելով որոշման պահանջները, ընդգծել է, որ քաղաքը շինարարական փոշուց պաշտպանելու համար շենքերի և շինություններ կառուցելու ընթացքում պարտադիր կերպով շինարարությանը համապատասխան բարձրությամբ 180 գրամ/քմ խտությամբ ցանցով պետք է ծածկել կառույցը:
4-րդ և 5-րդ աստիճանի ռիսկայնության օբյեկտների համար պետք է ապահովվի օդի որակը դիտարկող սարքավորումների տեղադրումը՝ առցանց հարթակի հասանելիությամբ, իսկ համայնքի կողմից՝ դրանց տվյալների ստուգաչափման հնարավորությունը:
Շինանյութի տեղափոխումը, պահպանումը պետք է կազմակերպվի անթափանց թաղանթներով, պահեստավորումը՝ փակ տարածքներում կամ ծածկերով:
Մայրաքաղաքի փողոցները չաղտոտելու համար մեքենաները տարածքից պետք է դուրս բերվեն միմիայն հատուկ մետաղական հարթակի վրա լվանալուց հետո:
Ավագանին սահմանել է նաև շինհրապարակների կազմակերպման պահանջներն ու տեղում անհրաժեշտ փաստաթղթերի ցանկը՝ նախագծից մինչև շինթույլտվություն:
Կառուցապատողները նշել են, որ պատրաստ են համագործակցել համայնքի հետ՝ քաղաքաշինության ոլորտի խնդիրները համատեղ լուծելու նպատակով:
