Երևանը դարձրել են քաղաք՝ մեքենաների համար, մարդկանց տեղ չի մնացել. Անահիտ Թարխանյան. ՏԵՍԱՆՅՈՒԹ

«Կուկուռուզնիկի վերականգնումը նպատակ ունի ստեղծելու մի միջավայր, որտեղ Հայաստանի և սփյուռքի երիտասարդները հանդիպելու, գաղափարներ կիսելու հնարավորություն կունենան, որտեղ կլինեն ժամանակակից լաբորատորիաներ և արվեստանոցներ: Քաղաքապետի նախորդ ընտրությունների ժամանակ Հայկ Մարությանն ասում էր՝ վերականգնելու ենք Երիտասարդության պալատը, հենց ընտրվեց՝ մոռացավ»,- Factor TV-ի հետ զրույցում նշում է ճարտարապետ Անահիտ Թարխանյանը:

Ի դեպ, «Ապրելու երկիր» կուսակցությունը և «Արթուր Թարխանյան կենտրոնն» ունեն համագործակցության հուշագիր, որը ներառում է նաև Երիտասարդության պալատի վերականգնման նախագիծը:

Անահիտ Թարխանյանը խոսում է նաև Երևանում հասարակական տրանսպորտի թեթևացման անհրաժեշտության մասին. «Օրինակ՝ մետրոյի նոր կայարանները կարող են լուծել այդ խնդիրը, բայց դրանց կառուցումը ժամանակատար կլինի, իսկ ահա ճոպանուղու գործարկումը կարող է արագ լուծել տրանսպորտի ծանրաբեռնվածության խնդիրը»:

Անահիտ Թարխանյանը մատնանշում է Երևանի ճարտարապետական, քաղաքաշինական խնդիրները՝ շեշտելով, որ երևանցիներին ապրելու տեղ չի մնացել, և անհրաժեշտ է վերադարձնել նրանց իրենց քաղաքը․ «Վերջին տարիների քաղաքաշինությունն անարխիա է հիշեցնում, չկա օրենք, գաղափարախոսություն, կա միայն փող և բիզնես: Երևանում երբևէ այսքան մեծ թվով մեքենաներ չեն եղել, Երևանը դարձրել են քաղաք՝ մեքենաների համար, մարդկանց տեղ չի մնացել»:

Ճարտարապետին մտահոգում է նաև Երևանում փոշու պարունակությունը, որը մի քանի անգամ գերազանցում է սահմանային թույլատրելի կոնցենտրացիան։

«Դրա պատճառներից մեկն այն է, որ Երևանի շուրջ անտառներ չկան, երկրորդ գլխավոր պատճառն այն է, որ 400-ից ավելի բազալտի հանքեր շրջապատում են Երևանը. դրանք պետք է ոչ թե փակել, այլ արդիականացնել»,- ասում է նա։

Մանրամասները՝ տեսանյութում:

Աննա Բաբաջանյան