Վրաստանն ու Չինաստանը դառնում են ռազմավարական գործընկերներ. Դարչիաշվիլի

«Վրաստանը և Չինաստանը դառնում են ռազմավարական գործընկերներ, ինչը նոր, շատ կարևոր խթան կհանդիսանա երկկողմ հարաբերություններում», –  արտգործնախարար Իլյա Դարչիաշվիլիի խոսքերն է մեջբերում Գրուզիա օնլայնը։

Նրա խոսքով` երկու երկրների միջև կամրապնդվեն առևտրատնտեսական և հումանիտար հարաբերությունները։
«Չինաստանի Ժողովրդական Հանրապետության նախագահ պարոն Սի Ցզինպինի հրավերով Վրաստանի վարչապետը պատմական այցով գտնվում է Չինաստանում։ Վրաստանի վարչապետը մի կողմից կմասնակցի Համաշխարհային ամառային ուսանողական խաղերի բացման արարողությանը, մյուս կողմից՝ Վրաստանի վարչապետը շատ կարևոր հանդիպում է ունեցել Չինաստանի Ժողովրդական Հանրապետության նախագահի հետ։

Այսօրվա հանդիպման հիմնական ուղերձն այն է, որ երկու երկրների՝ Վրաստանի և Չինաստանի ղեկավարները քննարկել են, որ երկու երկրների հարաբերությունները նոր փուլ են մտնելու։ Դա կլինի ռազմավարական համագործակցություն։ Վրաստանն ու Չինաստանը դառնում են ռազմավարական գործընկերներ, ինչը նոր, կարևոր լիցք կհաղորդի մեր երկկողմ հարաբերություններին։

Քաղաքական հարաբերությունների խորացման գործընթացն ավելի դինամիկ է լինելու. ամրապնդվելու են նաև երկու երկրների միջև առևտրատնտեսական և հումանիտար հարաբերությունները, և դա նոր, շատ ուժեղ խթան կհանդիսանա երկու երկրների միջև ապագա համագործակցության համար։

Սա իսկապես պատմական այց է, որը չի եղել երկար տարիներ: Վրաստանի վարչապետի պատմական այցի շրջանակներում նման որոշումը, անշուշտ, կնպաստի մեր երկու երկրների հետագա մերձեցմանը, հարաբերությունների ամրապնդմանը և երկու երկրների միջև քաղաքական հարաբերությունների սերտացմանը։ Ռազմավարական համագործակցությունը նոր էջ է մեր հարաբերություններում, որը, անշուշտ, կբերի կոնկրետ շոշափելի արդյունքների»,- ասել է Իլյա Դարչիաշվիլին։