Քաղաքականություն
27.07.2023 | 19:14
«Ակոս» թերթի հիմնադիր և գլխավոր խմբագիր, պոլսաայ լրագրող Հրանտ Դինքի սպանության գործով 62 կասկածյալների գործով Վճռաբեկ դատարանի հետաքննությունը հունիսին ավարտվել է։ Քանի որ գերագույն դատարանը հաստատել է որոշ կասկածյալների արդարացման և պատժաչափերի ժամկետի ավարտը, մերժել ներկայացված միջնորդագրերը, Դինքի ընտանիքի փաստաբանները դիմել են Սահմանադրական դատարան, գրում է Bianet-ը։
«Ակոս»-ը հայտնել է, որ փաստաբաններն իրենց միջնորդության մեջ ընդգծել են «ճշմարտությունն իմանալու իրավունքը» և մանրամասնել դատական գործընթացի սխալներն ու թերությունները։
«Ակնհայտ է, որ պաշտոնական փաստաթղթերը, որոնք կարող են օգնել բացահայտելու սպանության օրինաչափությունները, կեղծվել են, պահանջված արձանագրությունները և տեղեկությունները հանրային կառույցների կողմից չեն ուղարկվել դատարան, պահանջված ապացույցները չեն հավաքվել, հնարավոր չի եղել լսել պետական պաշտոնյաներին»,- նշված է փաստաբանների միջնորդության մեջ։
Հիշեցնենք, որ «Ակոս» թերթի հիմնադիր և գլխավոր խմբագիր Հրանտ Դինքը մահացու հրազենային վիրավորում էր ստացել 2007 թվականի հունվարի 19-ին Օգյուն Սամասթի կողմից՝ Ստամբուլում խմբագրության շենքի մոտ։
Էմմա Չոբանյան
