06.06.2026 | 20:00
Ում ենք ընտրում չընտրելով․ քվեարկության չԳնալու ՇԵՐՏԵՐԸ. ՏԵՍԱՆՅՈՒԹ
Ռուսաստանը հերթական հարվածն է հասցրել Օդեսայի շրջանի նավահանգստին
Քաղաքականություն
27.07.2023 | 16:29
Ռուսաստանը չորեքշաբթի լույս հինգշաբթի գիշերը նոր հրթիռային հարվածներ է հասցրել Օդեսայի շրջանին։ Հերթական անգամ հարձակման թիրախ են դարձել նավահանգստային ենթակառուցվածքի օբյեկտները։ Մեկ մարդ մահացել է։ Այս մասին հայտնել է շրջանային ռազմական վարչակազմի ղեկավար Օլեգ Կիպերը, գրում է VOA-ն։
Ուկրաինական «Հարավ» հրամանատարության տվյալներով՝ երկու ռուսական «Կալիբր» թևավոր հրթիռներ են արձակվել Սև ծովից։ Դրանք խոցել չի հաջողվել։
Հարվածի հետևանքով վնասվել է բեռնատար տերմինալներից մեկի տեխնիկան, ոչնչացվել է անվտանգության ծառայության շենքը և երկու ավտոմեքենա։ Անվտանգության աշխատակից է զոհվել, հավելել են ուկրաինացի զինվորականները։
Ուկրաինայի ԶՈՒ ռազմաօդային ուժերը նաև հայտնել են, որ գիշերը Ուկրաինայի տարածքով ութ «Շահեդ» կամիկաձե անօդաչու թռչող սարք է արձակվել։ Զինվորականների հավաստմամբ՝ բոլորը ոչնչացվել են։
Ռուսական բանակը հարվածներ է հասցնում Օդեսայի և Օդեսայի շրջանի ուղղությամբ հուլիսի 18-ից՝ Ռուսաստանի կողմից հացահատիկային գործարքից դուրս գալու հայտարարության հաջորդ օրը։ Ուկրաինայի իշխանությունները կարծում են, որ Մոսկվայի նպատակը հացահատիկի արտահանումը խափանելն է։
Ռուսաստանն իր գործողություններն անվանում է «վրեժ» հուլիսի 17-ի գիշերը Ղրիմի կամրջի վրա տեղի ունեցած պայթյունի համար։
