Նիգերի զինվորականները հայտարարել են նախագահի պաշտոնանկության մասին

Նիգերում զինվորական խումբն ազգային հեռուստատեսությամբ հայտարարել է, որ նախագահ Մուհամեդ Բազումը հեռացվել է իշխանությունից, փակվել են սահմանները, երկրում պարետային ժամ է սահմանվել: Այս մասին հայտնում է BBC-ի ռուսական ծառայությունը։

Նիգերի նախագահական գվարդիան երկրի ղեկավար Մուհամեդ Բազումին արգելափակել է իր նստավայրում։ Սկզբում նախագահի գրասենյակը հաղորդագրություն էր տարածել, որ ո՛չ բանակը, ո՛չ էլ Ազգային գվարդիան չեն աջակցում ապստամբներին։ Սակայն մի քանի ժամ անց տեղեկություններ եղան, որ Բազումը պաշտոնանկ է արվել։

Ավելի ուշ հայտնի դարձավ, որ Բենինի նախագահ Պատրիս Թալոնը մեկնել է Նիգեր՝ միջնորդելու իրավիճակի կարգավորմանը։

Աղբյուրները հայտնել են Jeune Afrique-ին, որ Բազումի մտադրությունը՝ պաշտոնանկ անել նախագահական գվարդիայի հրամանատար, գեներալ Օմար Չիանիին, կարող է պատրվակ ծառայել ապստամբության համար։ Չիանին այս պաշտոնում է Նիգերի նախորդ նախագահ Մահամադու Իսուֆուից հետո:

Ապստամբությունը տեղի է ունեցել Սանկտ Պետերբուրգում Ռուսաստան-Աֆրիկա գագաթնաժողովի ֆոնին։ Նիգերը չի մասնակցել գագաթնաժողովին։ Ըստ աղբյուրների՝ դա կապված չէ ապստամբության հետ։

Independent-ի բրիտանական հրատարակությունը գրել է, որ Նիգերում ռուսական «Վագների» վարձկաններ կան։ Բազումը, սակայն, հերքել է այս տեղեկությունը։ Նախագահի խոսքով՝ երկիրը չի պատրաստվում իր տարածք հրավիրել վագներականներին, քանի որ նրանք բազմաթիվ խնդիրներ են ստեղծում և զբաղված են ապատեղեկատվական արշավներով։