14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Աֆրիկյան 54 երկրներից 38-ի առաջնորդները հրաժարվել են մասնակցել Սանկտ Պետերբուրգի գագաթնաժողովին
Քաղաքականություն
26.07.2023 | 17:33
Աֆրիկյան երկրների ղեկավարների մեծ մասը հրաժարվել է մասնակցել Ռուսաստան-Աֆրիկա գագաթնաժողովին, որը տեղի կունենա հուլիսի 27-28-ը Սանկտ Պետերբուրգում՝ Վլադիմիր Պուտինի մասնակցությամբ։ ՌԴ նախագահի օգնական Յուրի Ուշակովի խոսքով՝ աֆրիկյան 54 երկրներից միայն 17-ը ներկայացված կլինեն պետությունների ղեկավարների մակարդակով։
Աֆրիկյան տասը երկրների պատվիրակությունները կգլխավորեն վարչապետները։ Գագաթնաժողովի մասնակիցների գրեթե կեսը պատվիրակություններ է ուղարկել ավելի ցածր մակարդակով։ Նրանցից 17-ը գլխավորում են փոխվարչապետերն ու նախարարները, 5-ը կներկայացնեն դեսպանները, ևս 5-ն ընդհանրապես հրաժարվել են մասնակցել միջոցառմանը, գրում է The Moscow Times-ը։
ՌԴ ԱԳՆ հատուկ դեսպան Օլեգ Օզերովն իր հերթին ՌԻԱ Նովոստիին տված հարցազրույցում ասել է, որ գագաթնաժողովի հրավերներ են ուղարկվել աֆրիկյան բոլոր պետությունների ղեկավարներին։ Նրա խոսքով՝ Մոսկվայում ըմբռնումով են վերաբերվում նրանց, ովքեր որոշել են չգալ։
Վլադիմիր Պուտինը կհանդիպի աֆրիկյան յուրաքանչյուր առաջնորդի, որը կմասնակցի գագաթնաժողովին։ Ըստ Ուշակովի՝ նախատեսված են ՌԴ նախագահի բանակցությունները Եգիպտոսի, Մոզամբիկի, Բուրունդիի, Զիմբաբվեի, Ուգանդայի, Էրիթրեայի, Կենտրոնական Աֆրիկյան Հանրապետության, Լիբիայի, Կամերունի, Սենեգալի, Հարավաֆրիկյան Հանրապետության, Բուրկինա Ֆասոյի, Գվինեա-Բիսաուի, Մալիի, Կոնգոյի ղեկավարների հետ։
Հուլիսի 28-ին Պուտինը ելույթ կունենա գագաթնաժողովում, որի ժամանակ կխոսի «նոր աշխարհակարգի» ձևավորման մասին, որը հիմնված կլինի բոլոր պետությունների «բազմաբևեռության և հավասարության» վրա, ասել է Ուշակովը։
Օրերս Պուտինը հոդված էր հրապարակել, որտեղ աֆրիկյան երկրներին հիշեցրել էր խորհրդային տնտեսական և տեխնիկական աջակցության մասին, խոսել ռուս-աֆրիկյան բարեկամության «ամուր և խորը արմատների» մասին և աֆրիկյան երկրներին «արժանի տեղ» խոստացել «նոր աշխարհում»։
