06.06.2026 | 10:33
Ըստ մեղադրանքի՝ Նորակերտի նախկին ղեկավարը յուրացրել է շուրջ 40 գույք՝ համայնքի հողեր, շենքեր և ավտոմեքենաներ
Բաղրամյան պողոտայում ակցիայի ժամանակ «Մայբախ»-ը վրաերթի է ենթարկել պարեկի. նա հիվանդանոցում է
Հասարակություն
26.07.2023 | 12:33
Բաղրամյան պողոտայում անհետ կորած զինծառայողների հարազատների բողոքի ակցիայի ժամանակ պարեկային ծառայող է վրաերթի ենթարկվել։ Ականատեսների վկայությամբ՝ «Մայբախ» մեքենայի վարորդը, շրջադարձի ժամանակ չնկատելով փողոցում ակցիան կանոնակարգող պարեկին, վրաերթի է ենթարկել նրան։ Ինչպես տեղեկացնում է ԵՊԲՀ աշխատակազմի ղեկավար Շուշան Դանիելյանը, պարեկն այս պահին հետազոտվում է.
«Հուլիսի 26-ին Բաղրամյան պողոտայում վրաերթի ենթարկված ՀՀ ոստիկանության պարեկը տեղափոխվել է «Հերացի» թիվ 1 համալսարանական հիվանդանոց` գանգատվելով ձախ ստորին վերջույթի ցավերից: Տուժածը գիտակից վիճակում է հոսպիտալացվել, այժմ հետազոտման փուլում է: Կտրվի լրացուցիչ տեղեկատվություն»,- ֆեյսբուքյան իր էջում գրել է Դանիելյանը։
Նշենք՝ Բաղրամյան պողոտայում բողոքի ակցիա են իրականացնում Էջմիածնի N զորամասի («Քիմիկների» զորամաս) զինծառայողների ծնողները, որոնց զավակներին 2021 թվականի հոկտեմբերի 21-ին տեղափոխել էին Արցախ մարտական առաջադրանքի և սխալ հրամանի պատճառով նրանք հայտնվել էին շրջափակման մեջ ու անհետ կորել:
Հարազատները փակել են Բաղրամյան պողոտա – Պռոշյան փողոց խաչմերուկը և պահանջում են հանդիպում Նիկոլ Փաշինյանի հետ: Նրանք մեկ շաբաթ առաջ ևս վարչապետի հետ հանդիպելու պահանջով բողոքի ակցիա էին կազմակերպել, սակայն, Փաշինյանն այդպես էլ չէր ընդունել։
