Պահանջում ենք ՀՀ-ից՝ հրաժարվել Արցախը Ադրբեջանի կազմում ճանաչելու մտահղացումից․ Գուրգեն Ներսիսյան. ՏԵՍԱՆՅՈՒԹ

Ավելի քան 7 ամից է արցախահայությունը պայքարում է կյանքի, իր պատմության, ներկայի ու ապագայի, իր տեսակի պահպանության, համայն հայության արժանապատցվության, իրավունքի համար։ Այյսօր ելույթ ունենալով համաժողովրդական հանրահավաքին ժամանակ՝ հայտարարեց Արցախի պետնախարար Գուրգեն Ներսիսյանը:
Նրա խոսքով՝ տասնամյակներ շարունակ Ադրբեջանը վարել է Արցախը էթնիկ զտման քաղաքականություն և այսօր անցել է իր հանցավոր ծրագրերի իրագործմանը:

«Պլանավորման, ծրագրավորման ու նախապատրաստության փուլերը վաղուց ավարտվել են և սկսվել է իրագործման փուլը: Ավելի քան 7 ամիս է Արցախի ժողովուրդը ենթարկվում է ֆիզիկական ու հոգեբանական բռնության, խոշտանգման: Արցախի ժողովրդին կանգնեցրել են սովի առաջ, զրկում են այսօր և վաղը ապրելու, գոյատևելուտարրական հնարավորություններից ու պայմաններից: Այս ամենի նպատակը Արցախում կյանքն անտանելի դարձնելն է, արցախցուն տարագիր դարձնելն է։

Հույս ունենալով, որ միջազգային հանրությունը, համայն հայությունը և ՀՀ-ն կձեռնարկեն Արցախի ժողովրդին էթնիկ զտումից զերծ պահելու որևէ քայլ, Արցախի ժողովուրդը հերոսաբար ու համբերատար կրել է բոլոր զրկանքները:

Սակայն ժամանակը ցույց տվեց, որ միջազգային հանրության պասիվությունն ու ՀՀ-ի զիջողականությունը լրացուցիչ խթան հանդիսացան և խրախուսեցին Ադրբեջանին դիմելու էլ ավելի կոշտ քայլերի, այդ ամենին զուգահեռ նսեմացնելով միջազգային հանրության ու միջնորդ երկրների հեղինակությունը: Այդ պատճառով Արցախում սկսվեց համաժողովրդական շարժում, որը պետք է հիմք դառնա մեր զարթոնքին ու համախմբմանը, և այն արդեն իրականություն է:

Սիրելի՛ հայրենակիցներ, ուզում եմ խոնարհվել ձեր առաջ, ձեր հաստատակամության, ձեր կամքի ու տոկունության համար: Թեև ամեն օր սպասում եք, թե երբ կվերջանա այս մղձավանջը, բայց և հասկանում եք, որ այս պայքարը երկար է տևելու»,- նշեց Ներսիսյանը:

«Պահանջում ենք ՀՀ-ից՝ հրաժարվել Արցախը Ադրբեջանի կազմում ճանաչելու մտահղացումից»,- իր ելույթում ընդգծեց Արցախի պետնախարարը։

Մանրամասները՝ տեսանյութում։