06.04.2026 | 23:30
Հրդեհ Թաիրով բնակավայրում. այրվել է ավտոմեքենա
Ռուս խաղաղապահները հնարավորություն ունեն օգնել՝ լուծելու Լեռնային Ղարաբաղի հումանիտար խնդիրները․ Լավրով
Քաղաքականություն
25.07.2023 | 20:44
Ռուսաստանի խաղաղապահ առաքելությունն ունի բոլոր հնարավորությունները՝ աջակցելու Լեռնային Ղարաբաղի հումանիտար խնդիրների լուծմանը։ Այս մասին հայտարարել է ՌԴ ԱԳ նախարար Սերգեյ Լավրովը ՀՀ արտգործնախարար Արարատ Միրզոյանի հետ Մոսկվայում տեղի ունեցած երկկողմ հանդիպմանը։
«Անկասկած, ինչպես վերջին օրերին, մենք հատուկ ուշադրություն ենք դարձնում Լաչինի միջանցքի շուրջ և ընդհանրապես Լեռնային Ղարաբաղում ստեղծված իրավիճակի կարգավորմանը: Մենք ցանկանում ենք նպաստել այնտեղ ծագած սուր հումանիտար խնդիրների լուծմանը։ Դրա համար կան ռուսական խաղաղապահ զորակազմի բոլոր հնարավորությունները։ Բայց առանց կողմերի համագործակցության դա հեշտ չէ անել»,- ասել է նա։
Լավրովը նշել է Մոսկվայի պատրաստակամությունը՝ նպաստելու Ադրբեջանի, Ռուսաստանի և Հայաստանի ղեկավարների եռակողմ պայմանավորվածությունների ամբողջ փաթեթի իրականացմանը, որոնք ձեռք են բերվել վերջին տարիներին։
«Կարևոր ենք համարում առաջ շարժվել հայ-ադրբեջանական հարաբերությունների կարգավորման բոլոր ուղիներով, ներառյալ՝ տրանսպորտային և տնտեսական հաղորդակցությունների ապաշրջափակումը, սահմանազատման հարցերը և հասարակական կառույցների և փորձագետների միջև երկխոսության հաստատումը։ Մենք պատրաստ ենք ամեն կերպ նպաստել դրան»,- ասել է նախարարը։
Լավրովի խոսքով՝ նախատեսվում է հատուկ շեշտադրում դնել «Բաքվի և Երևանի միջեւ խաղաղության պայմանագրի նախագծի լուծումների որոնման վրա»։
