Թող ոչ մեկին չթվա՝ Ղարաբաղի ակցենտով խոսելը նշանակում է լինել հերոս․ Փաշինյան․ ՏԵՍԱՆՅՈՒԹ

Այսօր հրավիրված ասուլիսում ընթացքում հնչեց ՀՀ վարչապետ Նիկոլ Փաշինյանին ուղղված՝ Շուշիի բնակչի՝ 44-օրյա պատերազմի մասնակից Միքայել Առաքելյանի՝ ձայնագրված հարցը

Արցախցին նախ արձանագրեց բզկտված Արցախի հումանիտար աղետալի պատկերը, ապա Փաշինյանից հետաքրքրվեց՝ արդյոք իրեն պատասխանատու զգո՞ւմ է այդ իրավիճակի համար, նրա խիղճը չի՞ տանջում, չի՞ ցանկանում հրաժարական տալ:
«Ո՞վ եք դուք, անհաջող քաղաքական գործի՞չ, թե՞ դավաճան.․․ մի՞թե Դուք չեք վախենում արժանանաք Մելիք Ֆրանգյուլի ճակատագրին, որի գերեզմանը բոլորն են անպատվում»,- իր հարցն այսպես ամփոփեց Միքայել Առաքելյանը:

Նաև հարց հնչեց, թե ինչու է ՀՀ վարչապետը կաշկանդված՝ ասելու Արցախի Հանրապետություն և գործածում է Լեռնային Ղարաբաղ եզրույթը, ի պատասխան՝ Փաշինյանը պարզաբանեց․ «Լեռնային Ղարաբաղ եզրույթը ֆիքսված է նոյեմբերի 9-ի հայտարարությամբ: Որից հետո Ադրբեջանի նախագահը սկսեց հայտարարել, որ չկա Լեռնային Ղարաբաղ, չկա նման եզրույթ։ Եվ մի հրաշքով, այդ թվում՝ հայկական իրականության մեջ, շատ մարդիկ սկսեցին ենթարկվել այդ հրովարտակին՝ սկսելով չօգտագործել այդ տերմինը: Հետո՝ մենք խոսում ենք միջազգային դիրքորոշումների մասին, ԼՂ հայության իրավունքների պաշտպանության մասին, ԼՂ միջազգային սուբյեկտայնության մասին: Հասկացությունների իմաստն ու ընկալելիությունը շատ կարևոր նրբություններ են։

Ես ասում եմ՝ Լեռնային Ղարաբաղ, որովհետև կարող եմ միջազգային հանրությանը բացատրել, թե ինչ է դա նշանակում։ Կա ստորագրված թուղթ դրա մասին: Եթե ինչ-որ մարդիկ Լեռնային Ղարաբաղ օգտագործելու մեջ տեսնում են դավադրություն և ասում են՝ Արցախ, Արցախ, նրանք, ըստ էության, իրենց դիրքորոշումը համապատասխանեցնում են Ադրբեջանի պաշտոնական դիրքրոշմանը, որ ԼՂ չկա: Ասում են ասեք՝ Արցախ։ Ասում եմ՝ Արցախ, Արցախ… հետո՞»:

Անդրադառնալով Միքայել Առաքելյանի հարցադրումներին՝ մասնավորապես արցախցիների անկոտրում լինելու վերաբերյալ դիտարկմանը, Փաշինյանը նշեց, որ չի ցանկանում հիշեցնել պատերազմի օրերին Ստեփանակերտից Երևան առաջացած խցանումների մասին:
«Դավաճանական կառավարությո՞ւն ենք, ուրեմն՝ այդ դավաճանական կառավարության աջակցությունից հրաժարվեք։ Դավաճանից փող ստացողն ի՞նչ է․․․ Հրաժարվեք։

Կամ այդ կենացները. անձամբ ճանաչում եմ նման կենաց ասողներին, որոնք պատերազմի ժամանակ 300-ի տակ ճողոպրում էին։ Թող ոչ մեկին չթվա, թե Ղարաբաղի ակցենտով խոսալը նշանակում է լինել հերոս, բացարձակապես չի նշանակում»։

«Ես պատասխանատու զգում եմ, հրաժարական տվել եմ. ես չեմ պատրաստվում ամեն օր հրաժարական տալ․․․
Ոչ մի բանից չեմ վախենում, ես վախենում եմ մեր կողմից կայացված և կայացվելիք սխալ որոշումների համար։ Եթե իմ կենսագրությունը գիտեք, պիտի իմ վախերի չափերն էլ շատ հայտնի լինի Ձեզ»:

Մանրամասները՝ տեսանյութում։