Իսրայելում դատական բարեփոխումների նոր օրինագծի դեմ բողոքի ցույցերը շարունակվել են մինչև ուշ գիշեր

Իսրայելի Թել Ավիվ և մի շարք այլ քաղաքներում բողոքի ցույցերը շարունակվել են մինչև ուշ գիշեր այն ​​բանից հետո, երբ Կնեսետն ընդունել է վիճահարույց օրինագիծը, որը կսահմանափակի Գերագույն դատարանի լիազորությունները։ Euronews-ի փոխանցմամբ՝ ոստիկանությունը կիրառել է ջրցան մեքենաներ՝ ցրելու հազարավոր ցուցարարներին, որոնք փակել են Թել Ավիվի և Երուսաղեմի առանցքային ճանապարհները։ Հաղորդվում է տասնյակ ձերբակալվածների մասին։

Կնեսետի 120 պատգամավորներից 64-ը երկուշաբթի կողմ են քվեարկել բարեփոխմանը, որի էությունն է դատարանին զրկել կառավարության գործողությունները չեղարկելու իրավունքից, որոնք նա համարում է անհիմն, և փոխել դատավորների ընտրության կարգը։

Ընդդիմադիր պատգամավորները զանգվածաբար լքել են նիստերի դահլիճը, մնացածները քվեարկության ժամանակ բղավել են՝ «Ամո՛թ»։ Նոր օրենքի հակառակորդները պնդում են, որ այն չափազանց մեծ լիազորություններ է տալիս քաղաքական գործիչներին և վտանգ է ներկայացնում ժողովրդավարության համար:

Իսրայելի վարչապետ Բենիամին Նեթանյահուն հատուկ հեռուստաուղերձում ասել է, որ օրենքի բարեփոխումների քվեարկությունն «անհրաժեշտ ժողովրդավարական քայլ է»:

«Այսօր մենք իրականացնում ենք անհրաժեշտ ժողովրդավարական քայլ։ Այն ուղղված է վերականգնելու իշխանության ճյուղերի միջև հավասարակշռությունը, որը գոյություն ուներ 50 տարի առաջ, երբ դատավորները չէին կարողանում բեկանել կառավարության որոշումները, որոնք նրանք համարում էին «անհիմն»: Մենք ընդունել ենք «խելամիտ փոփոխություն», որպեսզի ընտրված կառավարությունը կարողանա քաղաքականություն վարել՝ համաձայն երկրի քաղաքացիների մեծամասնության որոշման»,- ասել է Նեթանյահուն։

Դատական բարեփոխումերի դեմ սկսված շարժումը, որը մեկնարկել է հունվարից, երկրում դարձել է ամենախոշորներից մեկը։ Ընդդիմության առաջնորդ Յաիր Լապիդը երկուշաբթին անվանել է «տխուր օր»՝ հրաժարվելով ճանաչել իշխող կոալիցիայի հաղթանակը, քանի որ ընդունված միջոցը «ոչնչացնում է ժողովրդավարությունը»։

Էմմա Չոբանյան