Քաղաքականություն
21.07.2023 | 23:30
Թուրքիայի գլխավոր ընդդիմադիր Ժողովրդահանրապետական կուսակցության (CHP) Աղքատության գրասենյակի զեկույցի համաձայն՝ Թուրքիայում 51,6 միլիոն մարդ ապրում է սովի շեմից ներքև, գրում է Turkish Minute-ը:
Թուրքական արհմիությունների կոնֆեդերացիայի 2023 թվականի հունիսի տվյալները ցույց են տալիս, որ սովի շեմը, որը ներառում է այն գումարը, որը չորս հոգանոց ընտանիքը պետք է ծախսի սննդի հիմնական ծախսերի վրա, պետք է լինի 10,373 լիրա (386 դոլար):
Հրապարակված զեկույցը բացահայտում է Թուրքիայի խորացող տնտեսական ճգնաժամի ազդեցությունը բնակչության վրա։ Դրա համաձայն՝ Թուրքիայի բնակչության 98 տոկոսը կամ 83 միլիոն մարդ ապրում է աղքատության շեմից ցածր, մինչդեռ 51,6 միլիոնը (60,4 տոկոս)՝ սովի շեմից ցածր: Աղքատության շեմը, որը ներառում է նաև չորս հոգանոց ընտանիքի վարձակալության և կոմունալ ծախսերը, կազմում է 33,789 լիրա (1,257 դոլար):
Ուսումնասիրությունը նաև մեջբերել է ՄԱԿ-ի 2023 թվականի Կայուն զարգացման նպատակների զեկույցի տվյալները՝ կապված երկրորդ նպատակի՝ «Զրոյական սովի» հետ, և ասվում է, որ Թուրքիայում թերսնման մակարդակը 2,5 տոկոս է, մինչդեռ 5 տարեկանից փոքր երեխաների մոտ թերսնման տարածվածությունը կազմում է 5,5 տոկոս։
Ժողովրդահանրապետական կուսակցության զեկույցն անդրադարձել է նաև HungerMap-ին՝ Սովի քարտեզին, որը 2022 թվականի հունիսին պարզել էր, որ 14,8 միլիոն մարդ Թուրքիայում սննդի անբավարար սպառման խնդիր ունի: Այն ներառում էր նաև երկու «հրատապ հանձնարարականներ»՝ ուղղված Թուրքիայի իրավիճակը դեպի լավը փոխելուն։
«Անվճար սննդի ծրագիրը պետք է հրատապ նախաձեռնել կրթության բոլոր մակարդակներում։ Մայրական սննդի աջակցության փաթեթի ծրագիրը պետք է ընդլայնվի»,- ասվում է CHP-ի գրասենյակի զեկույցում։
Վերջին մի քանի տարիներին Թուրքիան տառապում է վատթարացող տնտեսությունից, բարձր գնաճից և գործազրկությունից, ինչպես նաև մարդու իրավունքների վատ վիճակից: Նախագահ Ռեջեփ Թայիփ Էրդողանը սխալ տնտեսական քաղաքականությունը վերընտրությունից հետո փորձում է շտկել։
Էմմա Չոբանյան
