Քաղաքականություն
21.07.2023 | 11:36Ռուսաստանն այսօր Արևմուտքի հետ լուրջ հակամարտության մեջ է ուկրաինական ճակատում, և երբ մենք դիմում ենք ՄԱԿ-ի Անվտանգության խորհրդին, ակնկալիք ունենք, որ Հայաստանը կարող է հասնել նրան, որ ՌԴ խաղաղապահ զորախմբին տրվի ՄԱԿ-ի մանդատ, կարո՞ղ է ՄԱԿ-ը նպատակահարմար գտնի այլ զորախմբերի տալ այդ մանդատը և ուղարկել: Այս մասին, այսօր՝ հուլիսի 21-ին, Արցախի ԱԺ արտահերթ նիստում դիմելով ԱԺ հայտարարության տեքստը ներկայացնող պատգամավոր Մարսել Պետրոսյանին, հարց ուղղեց Արցախի ԱԺ պատգամավոր Կարեն Հովհաննիսյանը:
«Այդ պարագայում ի՞նչ ջանք պետք է կարողանա դնել Հայաստանը, որպեսզի ռուս խաղաղապահներին կարողանա ՄԱԿ-ի անվտանգության մանդատի շնորհման հարցը կարգավորել: Միգուցե միանգամից ՄԱԿ-ին դիմենք, իրենք որոշեն»,- հետաքրքրվեց պատգամավորը:
Պատգամավոր Մարսել Պետրոսյանը պատասխանեց. «ՄԱԿ-ի մանդատը տրվում է անվտանգության խորհրդի և գլխավոր ասամբլեայի համատեղ համաձայնությամբ, որոշմամբ, բանաձևով և այլն: Խնդիրն այն է, որ այսօր մենք տեղյակ ենք, որ ինչ-ինչ բանակցային գործընթացներ են ընթանում գերտերությունների, ԵԱՀԿ Մինսկի խմբի նախկին համանախագահների միջև և չի բացառվում, որ կարողանան ընդհանուր հայտարարի գալ այդ հարցում:
Ինչ վերաբերում է ՌԴ խաղաղապահ ուժերին միջազգային մանդատ տրամադրելու հարցին, բոլոր դեպքերում մենք չենք որոշում: Մենք ընդամենը ներկայացնում ենք առաջարկություն, որը թերևս ամենաօպտիմալն է: Մենք հավատում ենք միջազգային հանրության ողջախոհությանը և կարծում ենք՝ նրանք ճիշտ մոտեցում կցուցաբերեն այս հարցում»:
Նշենք, որ Արցախի Հանրապետության Ազգային ժողովը գումարել է արտահերթ նստաշրջան, օրակարգում ԱԺ խմբակցությունների ներկայացրած Արցախի Հանրապետության Ազգային ժողովի ուղերձն է։ «ՄԱԿ-ի կողմից Արցախում խաղաղություն պարտադրելու համար պատշաճ միջոցներ ձեռնարկելու վերաբերյալ» ուղերձը ներկայացրեց ԱԺ պատգամավոր Մարսել Պետրոսյանը։ Այս ուղերձով Արցախի Ազգային ժողովը բարձրացնում է նաեւ Արցախում տեղակայված ռուսական խաղաղապահ առաքելությանը միջազգային մանդատ տրամադրելու հարցը։
Մանրամասները՝ տեսանյութում։
