15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
Միքայել Մինասյանի ծնողները հրավիրվել են Գլխավոր դատախազության ապօրինի ծագում ունեցող գույքի բռնագանձման գործերով վարչություն․ ՏԵՍԱՆՅՈՒԹ
Քաղաքականություն
20.07.2023 | 16:02
ՀՀ երրորդ նախագահ Սերժ Սարգսյանի խնամին՝ «Սուրբ Գրիգոր Լուսավորիչ» բժշկական կենտրոնի նախկին տնօրեն, Վատիկանում ՀՀ նախկին դեսպան Միքայել Մինասյանի հայրը՝ Արա Մինասյանը և մայրը՝ Արմինե Հասրաթյանը հրավիրվել են Գլխավոր դատախազության ապօրինի ծագում ունեցող գույքի բռնագանձման գործերով վարչություն: Ինչպես Factor.am-ը տեղեկանում է «Ազդարար» պաշտոնական հայտարարությունների կայքէջից, վարչությունն Արա Մինասյանին պատկանող գույքի առնչությամբ իրականացրել է ուսումնասիրություն, որի արդյունքում կազմվել է ամփոփագիր:
Ըստ հայտարարության՝ Մինասյանը և կինը պետք է Ապօրինի ծագում ունեցող գույքի բռնագանձման գործերով վարչություն ներկայանան հուլիսի 25-ին՝ ժամը 11։00-ին՝ ուսումնասիրության վերաբերյալ դիրքորոշում հայտնելու։
Արա Մինասյանը դեռևս 2018 թվականից երեք դրվագով ներգրավված է որպես մեղադրյալ` «Սուրբ Գրիգոր Լուսավորիչ» ԲԿ-ի կողմից «Սոցիալական փաթեթի» ծառայությունների մատուցման ընթացքում կեղծ տվյալներ ներկայացնելու միջոցով չարաշահումներ կատարելու և գնումների ընթացքում առանձնապես խոշոր չափերի վատնումներ կատարելու գործով, իսկ 2022թ. դեկտեմբերին Քննչական կոմիտեի կողմից հարուցված նոր քրեական հետապնդմամբ․ Մինասյանը մեղադրվում է 2014-2018թթ-ի ընթացքում իրեն վստահված առանձնապես խոշոր չափերով 416 մլն դրամը հափշտակելու մեջ։
Արա Մինասյանի նկատմամբ խափանման միջոց է ընտրված կալանավորումը, նա 2018 թվականից հետախուզման մեջ է: Նշենք, որ Արա Մինասյանի մյուս որդին ՀՀ արդարադատության նախարար Գրիգոր Մինասյանն է։
Մանրամասները՝ տեսանյութում։
Ռոզա Վարդանյան
