13.01.2025 | 09:00
Վաչագան Ղազարյանի գործով դատական նիստը` ՈՒՂԻՂ
Երևանի ավտոկայանատեղիների ապօրինի կանգնակները հեռացվում են, տնտեսվարողները՝ տուգանվում
Հասարակություն
19.07.2023 | 23:11
Երևանի ավտոկայանատեղիների հատվածում տեղադրված ստվարաթղթե ու փայտե արկղերի, մետաղական ու պլաստմասե արգելանշանների տեսքով ապօրինի կանգնակները խոչընդոտում են երթևեկությունն ու կայանումը, դրանք հեռացվում են, տնտեսվարողները՝ տուգանվում։ Այս մասին տեղեկացրին Երևանի քաղաքապետարանից։
«Ճանապարհի երթևեկելի հատվածում օրենքն արգելում է կանգնակ տեղադրել: Չկա նման վայր կամ տեղ, որտեղ թույլատրվում է կանգնակ դնել: Դրանք, իհարկե, տարբեր պատճառներով են տեղադրվում՝ գումար շորթելու, հատկացված ծառայողական կայանատեղի այլ մարդկանց մուտքը չթույլատրելու համար»,- ասում է Երևանի քաղաքապետարանի հասարակական կարգի պահպանության ծառայության պետ Արամ Գյուլզադյանը:
Ըստ աղբյուրի՝ խնդիրը լուծելու համար Երևանի քաղաքապետարանի հասարակական կարգի պահպանության ծառայությունը պարեկային ծառայության հետ ամենօրյա ուժեղացված ստուգայցեր է անում: Կանգնակները հեռացվում են, տնտեսվարողները՝ տուգանվում:
«Վարչական իրավախախտումների վերաբերյալ օրենսգրքի 140-րդ հոդվածի 5-րդ մասի համաձայն, նաև «Ճանապարհային երթևեկության անվտանգության ապահովման մասին» օրենքի 23-րդ հոդվածի 4-րդ մասով՝ կանգնակն այս հատվածներում արգելվում է: Տուգանքը 25.000 ՀՀ դրամ է: Արձանագրությունը կազմվում է տեղում, քաղաքացուն տրամադրում ենք կտրոնը. 30 օրվա ընթացքում կարող է վճարել կամ բողոքարկել»,- նշում են պարեկային ծառայողները:
«Կանգնակները խնդիր են ամբողջ քաղաքում, հատկապես՝ կենտրոնում, կան նաև մշտական հասցեներ»,- դժգոհում են վարորդները: Տնտեսվարողներն էլ հակադարձում են՝ եթե չտեղադրե՝ն մուտքը կփակվի:
Նշվում է, որ հունվարից մինչև հիմա մոտ 1000 կանգնակ է հեռացվել: Ստուգայցերը լինելու են շարունակական: Քաղաքապետարանը հորդորում է տնտեսվարողներին՝ չխախտել օրենքն ու չտեղադրել կանգնակներ:
