13.12.2024 | 09:49
Փաշինյանն աշխատանքային այցով մեկնել է Ռուսաստան
Աբդոլահիանն ու Լավրովը քննարկել են Հարավային Կովկասում զարգացումները, «3+3» ձևաչափը
Քաղաքականություն
19.07.2023 | 11:25
Իրանի ԱԳ նախարար Հոսեյն Ամիր Աբդոլահիանը հեռախոսազրույց է ունեցել ՌԴ ԱԳ նախարար Սերգեյ Լավրովի հետ։ Իրանի ԱԳՆ հաղորդմամբ՝ նախարարները երկու երկրների հարաբերություններն անվանել են զարգացող և ընդգծել երկրների նախագահների կամքը՝ է՛լ ավելի զարգացնելու դրանք, փոխանցում է Mehr գործակալությունը։
Անդրադառնալով Հարավային Կովկասի զարգացումներին՝ կողմերն ուշադրություն են հրավիրել Իրանի արտաքին գործերի նախարարի և Ադրբեջանի նախագահի վերջին զրույցի ուղղությամբ։
«Ինչ վերաբերում է Կովկասյան տարածաշրջանին, ապա ընդգծվել է տարածաշրջանային բանակցությունների շրջանակը, ներառյալ, այսպես կոչված, «3+3» ձևաչափը, որը ներառում է մի կողմից՝ Իրանը, Ռուսաստանը, Թուրքիան, մյուս կողմից՝ Ադրբեջանը, Հայաստանը և Վրաստանը»,- ասվում է հաղորդագրության մեջ։
Երկու նախարարները քննարկել են նաև Իրանի, Ռուսաստանի, Թուրքիայի և Սիրիայի արտգործնախարարների երկրորդ հանդիպման անցկացումը։
Աբդոլահիանն իր զարմանքն է արտահայտել Պարսից ծոցի երեք իրանական կղզիների մասին պարբերության բովանդակության վերաբերյալ, որը ներառված է Ռուսաստանի և Պարսից ծոցի երկրների միջև վերջերս Մոսկվայում կայացած համատեղ հայտարարության մեջ և ընդգծել այդ կղզիների նկատմամբ Իրանի պատմական և հավերժական սեփականությունը:
«Իրանի Իսլամական Հանրապետության անկախությունը, ինքնիշխանությունն ու տարածքային ամբողջականությունը ոչ մի կերպ սակարկելի չի եղել և չի լինելու»,- ասել է նա։
Լավրովն իր հերթին ընդգծել է Ռուսաստանի կողմից ՄԱԿ-ի կանոնադրության բոլոր սկզբունքների պահպանումը, այդ թվում՝ պետությունների ինքնիշխանության և տարածքային ամբողջականության սկզբունքներն ու ընդգծել, որ «Ռուսաստանի Դաշնությունը կասկածներ չունի Իրանի ինքնիշխանության և տարածքային ամբողջականության առումով և լիովին հարգում է այն»:
Կողմերը նաև մտքեր են փոխանակել Իրանի և Ռուսաստանի միջև ռազմավարական համաձայնագրի տեքստի մշակման վերջին փուլերի շուրջ։
ՌԴ ԱԳՆ հայտարարության մեջ, ի դեպ, Հարավային Կովկասում իրավիճակի քննարկման վերաբերյալ ոչինչ չի նշվում։
Էմմա Չոբանյան
