27.06.2026 | 01:34
5.5 մլրդ դոլար. աշխարհի ամենաթանկ ստադիոնում ԱՄՆ-Թուրքիա հանդիպման ետնաբեմը Factor TV-ի թղթակցի աչքերով
Էրդողանի այցի արդյունքներով Թուրքիան և Սաուդյան Արաբիան մի շարք ոլորտներում համաձայնագրեր են կնքել, այդ թվում՝ թուրքական ԱԹՍ-ների գնման
Քաղաքականություն
18.07.2023 | 19:21
Թուրքիայի նախագահ Ռեջեփ Թայիփ Էրդողանի՝ Պարսից ծոցի երկրներ եռօրյա շրջագայության առաջին կանգառը Սաուդյան Արաբիան էր։ Էրդողանի և Սաուդյան Արաբիայի թագաժառանգ արքայազն Մուհամմեդ բեն Սալմանի՝ նեղ և ընդլայնված կազմերով բանակցություններից հետո երկու երկրների միջև ուղղակի ներդրումների, պաշտպանական արդյունաբերության, էներգետիկայի, պաշտպանության և հաղորդակցության ոլորտներին առնչվող համաձայնագրեր են ստորագրվել, փոխանցում է Անադոլու գործակալությունը։
Ուղղակի ներդրումների խթանման ոլորտում փոխըմբռնման և համագործակցության հուշագիր են ստորագրել Թուրքիայի նախագահի աշխատակազմին առընթեր ներդրումային գրասենյակի ղեկավար Ահմեդ Բուրաք Դաղլըօղլուն և Թագավորության ներդրումների նախարար Խալիդ Ալ-Ֆալիհը։ Թուրքիայի նախագահի աշխատակազմին առընթեր հաղորդակցության վարչության և Սաուդյան Արաբիայի տեղեկատվության նախարարության միջև նույնպես փոխըմբռնման և համագործակցության հուշագիր է ստորագրվել։
Երկու երկրների Պաշտպանության նախարարությունների միջև համագործակցության իրականացման ծրագիր է ստորագրվել ՊՆ ղեկավարների կողմից, իսկ Էներգետիկայի նախարարությունների միջև էներգետիկայի ոլորտում փոխըմբռնման հուշագիր է ստորագրվել։
Բացի այդ, համաձայնագիր է ստորագրվել Սաուդյան Արաբիայի ՊՆ-ի և թուրքական անօդաչուներ արտադրող Baykar ընկերության միջև։ Փաստաթուղթը ստորագրել են ընկերության գործադիր տնօրեն Հալուք Բայրաքթարը և Սաուդյան Արաբիայի պաշտպանության փոխնախարար Խալիդ բեն Հուսեյն Ալ-Բայարին։
Սաուդյան Արաբիայի պաշտպանության նախարար, արքայազն Խալիդ բեն Սալմանը նշել է, որ իր երկիրը ձեռք կբերի անօդաչու թռչող սարքեր՝ «Թագավորության զինված ուժերի պատրաստվածությունը բարձրացնելու և նրա պաշտպանական ու արտադրական կարողությունները ուժեղացնելու նպատակով»։
Baykar-ի գործադիր տնօրեն Հալուք Բայրաքթարն իր հերթին ասել է, որ սաուդցիները գործարք են կնքել ընկերության հետ Akinci անօդաչու թռչող սարքի ներկրման վերաբերյալ, ինչպես նաև համագործակցության համաձայնագիր: Նա դա անվանել է Սաուդյան Արաբիայի հետ Թուրքիայի պատմության մեջ ամենամեծ պաշտպանական և ավիացիոն արտադրանքի արտահանման պայմանագիրը։
Էմմա Չոբանյան
