15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
ԱՄՆ-ը F-16 և F-35 կործանիչներ է ուղարկում Մերձավոր Արևելք
Քաղաքականություն
18.07.2023 | 20:11
Միացյալ Նահանգները լրացուցիչ F-35 և F-16 կործանիչներ և ռազմանավ կուղարկի Մերձավոր Արևելքի տարածաշրջան՝ Հորմուզի նեղուցում նավագնացության հիմնական ուղիների նկատմամբ վերահսկողությունը մեծացնելու համար: Այս մասին հայտարարել են Պենտագոնում՝ այս միջոցառումները բացատրելով վերջին ամիսներին իրանցիների կողմից առևտրային նավերի առգրավման դեպքերի աճով, գրում է VOA-ն։
Մայիսին նախագահ Ջո Բայդենի վարչակազմը հայտարարեց տարածաշրջանում իրավիճակի կայունացմանն ուղղված մի շարք քայլերի մասին՝ չհստակեցնելով, թե կոնկրետ ինչ են ներառելու նոր միջոցները։
«Պենտագոնը մեծացնում է իր ներկայությունը և կարողությունը՝ վերահսկելու Հորմուզի նեղուցը և շրջակա ջրերը»,- ասել է Պենտագոնի խոսնակ Սաբրինա Սինգհը:
Այս պահին պարզ չէ, թե ավիաբազաներից որն է ընդունելու կործանիչները և որքան ժամանակ դրանք կմնան տարածաշրջանում։
Իրանական ռազմանավերի հարձակումները Հորմուզի նեղուցով և Օմանի ծոցով անցնող առևտրային նավերի վրա 2019 թվականից ի վեր հաճախակիացել են: Աշխարհի հում նավթի և նավթամթերքի մոտ մեկ հինգերորդն անցնում է Հորմուզի նեղուցով:
Այն բանից հետո, երբ 2015-ին Իրանի հետ «միջուկային գործարքը» չվերակենդանացավ, Թեհրանի և Արևմուտքի հարաբերությունները վատթարացան՝ ստիպելով Վաշինգտոնին և դաշնակիցներին ուղիներ որոնել իրանական միջուկային ծրագիրը վերահսկելու համար:
Տաթև Ֆռանգյան
