24.07.2026 | 23:45
Գագիկ Ծառուկյանի նկատմամբ նոր հանրային քրեական հետապնդում է հարուցվել. փաստաբան
Թեհրանի և Բաքվի հարաբերությունների կարգավորման ֆոնին Իրանում երկկողմ պետական հանձնաժողովի նիստ է անցկացվում
Քաղաքականություն
17.07.2023 | 21:26
Թեհրանի և Բաքվի հարաբերությունների բարելավման պայմաններում Իրանի Աստարա քաղաքում ընթանում է երկու երկրների միջև տնտեսական, առևտրային և հումանիտար ոլորտներում համագործակցության պետական հանձնաժողովի նիստը, գրում են ադրբեջանական լրատվամիջոցները։
Նշվում է, որ ադրբեջանական կողմից հանդիպումը նախագահում է փոխվարչապետ Շահին Մուստաֆաևը, իրանական կողմից՝ ճանապարհների և քաղաքաշինության նախարար Մեհրդադ Բազարփաշը։ Նիստում քննարկվում են համագործակցության հարցեր, այդ թվում՝ երկաթուղիների և մայրուղիների նախագծերի։
Իրանական լրատվամիջոցների հաղորդմամբ՝ Մուստաֆաևն ասել է, որ երկու երկրների միջև միջազգային տարանցումն աճել է 58%-ով։ Նա նշել է, որ Ադրբեջանը հավատում է «Իրանի հետ համագործակցության զարգացմանը և գնում է այդ քաղաքական ճանապարհով»։
Անդրադառնալով միջազգային պայմանագրերին, հատկապես՝ Ռուսաստանի հետ, Բազարփաշն ասել է․ «Այսօր այս հանդիպման օրակարգում կան նախագծեր և որոշ ծրագրեր, որոնք ռազմավարական և կարևոր նախագծեր են երկու երկրների համար»։
Հավելենք, որ օրերս Իրանի ԱԳ նախարար Հոսեյն Ամիր Աբդոլահիանը, որը Բաքվում մասնակցում էր Չմիավորման շարժման կազմակերպության համակարգող բյուրոյի նախարարական հավաքին, հանդիպել էր Ադրբեջանի նախագահ Իլհամ Ալիևին, որը վերջին շրջանում պարբերաբար հակաիրականական հռետորաբանությամբ է հանդես գալիս։
Աբդոլահիանը Բաքվում լրագրողների հետ զրույցում հայտնել էր, որ կողմերը պայմանավորվել են շարունակել տնտեսական նախագծերը, արագացնել Իրանի տարածքով Ադրբեջանն ու Նախիջևանը կապող միջանցքի գործարկումը։ Նա նաև ասել էր, որ Իրանը կողմ է Հարավային Կովկասում տրանսպորտային ուղիների ապաշրջափակմանը, սակայն դեմ է սահմանների փոփոխությանը։
Հիշեցնենք՝ երկու երկրների հարաբերությունները բավական լարված են։ Ադրբեջանի ԱԳՆ-ն իր քաղաքացիներին հորդորել է Իրան չայցելել։ Վերջերս նաև տեղեկություններ էին տարածվել, որ Իրանում ձերբակալվել է Ադրբեջանի քաղաքացի Ֆարիդ Սաֆարլին՝ լրտեսության մեղադրանքով։ Իր հերթին, Բաքուն շարունակվում է կրոնական տարբեր գործիչների ձերբակալությունները՝ Իրանի օգտին լրտեսություն կատարելու կասկածանքով։ Հունիսի 23-ից էլ Ադրբեջանը դադարեցրել է Իրանի քաղաքացիներին վիզաների տրամադրումն իր օդանավակայաններում։ Բացի այդ, հունվարից՝ Թեհրանում Ադրբեջանի դեսպանատան վրա զինված հարձակումից հետո, Բաքուն փակել է իր դիվանագիտական ներկայացուցչությունն Իրանում։
Էմմա Չոբանյան
