Թուրքիայում շահարկում են անվանել ԱՄՀ-ի կողմից վարկի դիմաց ՆԱՏՕ-ին Շվերդիայի անդամակցությանը համաձայնելու մասին լուրերը

Միջազգային որոշ լրատվամիջոցների հաղորդագրություններն այն մասին, որ Անկարան համաձայնել է հաստատել ՆԱՏՕ-ին Շվեդիայի անդամակցությունը Արժույթի միջազգային հիմնադրամից (ԱՄՀ) 11-ից 13 միլիարդ դոլարի չափով վարկի դիմաց, «զուտ շահարկումներ են»։ Նման հայտարարություն է արել Թուրքիայի փոխնախագահ Ջևդեթ Յըլմազը թուրքական TRT Haber-ին տված հարցազրույցում։

«2013 թվականին պարոն նախագահը վերջ դրեց ԱՄՀ-ի հետ հարաբերություններին՝ այն ժամանակ իսկապես ուժեղ կամք դրսևորելով և այս իմաստով բոլոր պարտքերը փակելով։ Այդ ժամանակից Թուրքիան 10 տարի առանց Արժույթի միջազգային հիմնադրամի և հաջողությամբ կառավարել է իր տնտեսական գործընթացները շատ դժվար ժամանակաշրջանում։ Եվ Թուրքիան կշարունակի դա անել ապագայում: Այս առումով մենք միջազգային միջավայրում ո՛չ փնտրտուք ունենք, ո՛չ օրակարգ, ո՛չ էլ նման խոսակցություն»,- ասել է Յըլմազը։

Մինչև վերջերս Թուրքիան արգելափակում էր Շվեդիայի անդամակցությունը Հյուսիսատլանտյան դաշինքին՝ քննադատելով Թուրքիայում ահաբեկչական ճանաչված Քուրդիստանի աշխատավորական կուսակցության (PKK) նկատմամբ Ստոկհոլմի բարենպաստ վերաբերմունքը։

Հուլիսի 10-ին, սակայն, ՆԱՏՕ-ի գլխավոր քարտուղար Յենս Ստոլտենբերգը հայտարարեց, որ Թուրքիայի նախագահ Ռեջեփ Թայիփ Էրդողանը համաձայնել է ՆԱՏՕ-ին Շվեդիայի անդամակցելու մասին արձանագրությունն ուղարկել երկրի խորհրդարան և ապահովել դրա վավերացումը։

Հինգ օր անց՝ հուլիսի 15-ին, Թուրքիայի նախագահի վարչակազմի հաղորդակցության բաժնի ղեկավար Ֆահրեթթին Ալթունը հոդված հրապարակեց Middle East Eye-ում, որտեղ Շվեդիայի անդամակցությունը Հյուսիսատլանտյան դաշինքին անվանեց «հաղթական քայլ ինչպես Անկարայի, այնպես էլ ՆԱՏՕ-ի համար»:

Տաթև Ֆռանգյան