06.06.2026 | 11:21
ԿԸՀ-ն բավարարել է պատգամավորի 6 թեկնածուի անձեռնմխելիությունից զրկելու միջնորդությունը. նրանց ձերբակալելու որոշում է կայացվել
Ընդունել են, որ իրենք աշխատանք ունեն անելու՝ հումանիտար ճգնաժամը վերացնելու համար․ Արցախի պետնախարարը՝ ռուս խաղաղապահների հրամանատարության հետ հանդիպման մասին
Քաղաքականություն
14.07.2023 | 18:11
Այսօր Արցախում համաժողովրդական շարժման մասնակիցները ռուս խաղաղապահ զորակազմի տեղակայման վայրում խաղաղ ակցիա են իրականացրել՝ Արցախի կյանքի ճանապարհի ապաշրջափակման պահանջով։ ԱՀ պետնախարար Գուրգեն Ներսիսյանը, ներկայացնելով շարժման պահանջները, նշել է, որ Արցախի ժողովուրդը 2020 թվականի եռակողմ հայտարարության շահառուն է, և եթե դրա կետերը երեք կողմերից ոչ մեկը չի կատարում, չի նշանակում, որ դրա հետևանքներն արցախցին պետք է կրի, հաղորդում է Արցախպրեսը։
«Դրա համար ներկայացել ենք և ամբողջ Արցախի անունից ասում ենք, որ երբ Արցախը, գտնվելով շրջափակման մեջ, ամենօրյա ռեժիմով ուղղաթիռներ են թռչում, սա ընկերական, բարեկամական, գործընկերային չէ»,- շեշտել է նա։
Այնուհետև Գուրգեն Ներսիսյանն ու շարժման մի խումբ ներկայացուցիչներ հանդիպել են ռուսական խաղաղապահ զորակազմի հրամանատարության հետ։
Հանդիպումից հետո պետնախարարը հայտարարել է, որ խաղաղապահ զորակազմի հրամանատար, գեներալ Ալեքսանդր Լենցովի հետ որոշվել է, որ նրանց կողմից ամենօրյա ռեժիմով ՌԴ-ին կզեկուցվի Արցախում տիրող իրավիճակը։ Ըստ նրա՝ խաղաղապահ առաքելության հրամանատարությունն ընդունում է, որ խախտվել են 2020 թվականի եռակողմ հայտարարության դրույթները։
«Պարտավորվել և ընդունել են, որ իրենք աշխատանք ունեն անելու՝ հումանիտար ճգնաժամը վերացնելու համար»,- հավելել է Գուրգեն Ներսիսյանը։
Նա նաև տեղեկացրել է, որ Ասկերանի շրջանի բնակիչները կմնան խաղաղապահ զորակազմի մշտական տեղակայման վայրի մոտ՝ մինչև հստակ լուծումներ չտրվեն խնդրին, իսկ շարժման մասնակիցների մի մասը վերադարձել է Ստեփանակերտ, որտեղ նույնպես վրաններ են տեղադրվել, Ներսիսյանի բնորոշմամբ՝ Արցախում ստեղծված իրավիճակի կարմիր լույսը վառ պահելու և համաժողովրդական շարժումը շարունակելու նպատակով։
