15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
1960թ. վեր առաջին անգամ Հոլիվուդի դերասանները միացել են սցենարիստների գործադուլին
Քաղաքականություն
14.07.2023 | 15:48
Հոլիվուդյան դերասանները միացել են մայիսից սկսված սցենարիստների գործադուլին։ Հոլիվուդի և ամերիկյան հեռուստատեսության ավելի քան 160.000 դերասաններ ուրբաթ օրվանից դադարեցնում են նկարահանումները, ինչպես նաև չեն մասնակցի գովազդային արշավների և ներկա չեն լինի պրեմիերաներին, գրում է Euronews-ը։
Կինոդերասանների գիլդիայի արհմիությունը՝ SAG-AFTRA-ն, հայտարարել է գործադուլ մեկնարկի մասին՝ այն անվանելով «վերջին փաստարկը» այն բանից հետո, երբ կինոստուդիաների հետ ավելի բարձր աշխատավարձերի և կինոարտադրության մեջ արհեստական բանականության կիրառման սահմանափակումների վերաբերյալ բանակցությունները ձախողվել են։
«Ամբողջ բիզնես մոդելը փոխվել է սթրիմինգի, թվայնացման, AI-ի միջոցով։ Սա պատմական պահ է։ Սա ճշմարտության պահն է։ Եթե հիմա ոտքի չկանգնենք, բոլորս էլ փորձանքի մեջ կլինենք: Մեզ բոլորիս կարող են փոխարինել մեքենաներով»,- ասել է SAG-AFTRA-ի նախագահ Ֆրեն Դրեշերը։
Այն բանից հետո, երբ արհմիությունը հայտարարել է գործադուլի մասին, «Օպենհեյմեր» ֆիլմի դերասաններ Կիլիան Մերֆին, Մեթ Դեյմոնն ու Էմիլի Բլանտը Լոնդոնում լքել են ֆիլմի պրեմիերան։
Աշխատավարձի շուրջ բանակցություններն առաջին հերթին վերաբերում են երկրորդական դերակատարներին, քանի որ պայմանագրերը Հոլիվուդի աստղերի հետ կնքվում են հատուկ պայմաններով, սակայն նրանցից շատերը հայտարարել են գործադուլին իրենց մասնակցության մասին՝ ի նշան գործընկերների հետ համերաշխության։
Վերջին անգամ Հոլիվուդի դերասաններն ու սցենարիստները համատեղ գործադուլ են անցկացրել 1960 թվականին։
Էմմա Չոբանյան
