06.06.2026 | 15:33
Հողամասը կանցնի պետությանը․ Հակակոռուպցիոն դատարանը բավարարել է Դատախազության հայցը
Կրեմլը փորձում է ցույց տալ, որ կառավարում է իրավիճակը Պրիգոժինի ապստամբության փորձից հետո․ ISW
Քաղաքականություն
11.07.2023 | 22:04
Պատերազմի ուսումնասիրության ամերիկյան ինստիտուտը (ISW) հերթական զեկույցում վերլուծում է նախորդ օրը տեղի ունեցած երկու իրադարձություն՝ «Վագների» ձախողված ապստամբությունից հետո ՌԴ Գլխավոր շտաբի պետ Վալերի Գերասիմովի՝ առաջին անգամ հրապարակային հայտնվելը և Կրեմլի կողմից փաստի ընդունումը, որ նախագահ Վլադիմիր Պուտինը հանդիպել է Եվգենի Պրիգոժինի հետ, գրում է BBC-ի ռուսական ծառայությունը։
Գերասիմովի ելույթը, ըստ փորձագետների, հաստատում է ISW-ի նախկին գնահատականն այն մասին, որ նա, ամենայն հավանականությամբ, կպահպանի պաշտոնը, քանի որ նրան պաշտոնանկ անելը չափազանց մեծ վնաս կհասցնի Կրեմլի և ՌԴ Պաշտպանության նախարարության հեղինակությանը:
Շոյգուին և Գերասիմովին հեռացնելու Պրիգոժինի պահանջներին համաձայնելը, հավանաբար, վնաս կհասցներ ռեժիմի անվտանգությանը՝ ստեղծելով նախադեպ և ցույց տալով, որ դիմադրությունն ու բաց ապստամբությունն օրինական միջոց են ակնկալվող նպատակներին հասնելու համար։
Զեկույցում ասվում է, որ Պրիգոժինի հետ հանդիպելու՝ Պուտինի որոշումը չի համապատասխանում «Վագների» ղեկավարի հետ կապված Կրեմլի նախկին հռերոտորաբանությանը։ Ըստ ISW-ի՝ նրանք, հավանաբար, որոշել են հրապարակել հանդիպման փաստը, որպեսզի վերացնեն Պրիգոժինի՝ Ռուսաստանում ազատ տեղաշարժվելու հնարավորության մասին հարցերը։
Ըստ փորձագետների՝ երկու իրադարձություններն էլ, ամենայն հավանականությամբ, Կրեմլի ավելի լայն արշավի մաս են կազմում՝ նպատակ ունենալով ցույց տալ, որ ամբողջովին վերահսկում է իրավիճակն ապստամբության փորձից հետո։ Սա նաև պետք է վկայի այն մասին, որ ապստամբները պաշտոնապես հրաժարավել են Ռուսաստանի ռազմական ղեկավարությանը փոխելու կոչից։
ISW-ն եզրակացնում է՝ այս ամենը ցույց է տալիս, որ Կրեմլն ավելի շատ փորձում է ապստամբությունը, դրա հնարավոր հետևանքները և ռազմական ղեկավարներին փոխարինելու կոչերը ներկայացնել որպես լուծված գործ։
Էմմա Չոբանյան
