ԲՐԻՔՍ-ի գագաթնաժողովը դեմ առ դեմ ձևաչափով կանցկացվի

Հարավաֆրիկյան Հանրապետության նախագահ Սիրիլ Ռամաֆոսան հայտարարել է, որ ԲՐԻՔՍ-ի գագաթնաժողովը կանցկացվի դեմ առ դեմ։ Նա չի նշել՝ արդյո՞ք գագաթնաժողովին կմասնակցի Ռուսաստանի նախագահ Վլադիմիր Պուտինը, որը միջազգային քրեական դատարանի կողմից հետախուզվում է ուկրաինացի երեխաների անօրինական արտաքսման մեղադրանքների առնչությամբ, գրում է Euronews-ը։

ԲՐԻՔՍ-ի գագաթնաժողովը կանցկացվի Յոհաննեսբուրգում օգոստոսի 22-ից 24-ը։ Ռամաֆոսան հրավերներ է ուղարկել ասոցիացիայի անդամ երկրների բոլոր ղեկավարներին։

«ԲՐԻՔՍ-ի գագաթնաժողովը լինելու է դեմ առ դեմ ձևաչափով: Բոլորս վճռական ենք հանդիպում անցկացնել, երբ կարողանանք ուղղակիորեն շփվել: Մենք երեք տարի դեմ առ դեմ ԲՐԻՔՍ-ի գագաթնաժողով չենք ունեցել: Հետևաբար, կներեք ձեզ հիասթափեցնելու համար, բայց գագաթնաժողովը վիրտուալ չի լինի»,- ասել է Հարավային Աֆրիկայի նախագահը։

Սիրիլ Ռամաֆոսան հայտնել է նաև, որ առաջիկա հանդիպմանը կքննարկվի ԲՐԻՔՍ-ի խմբի ընդլայնման հարցը։

Նշենք, որ որպես Միջազգային քրեական դատարանի անդամ՝ Հարավային Աֆրիկան ստիպված կլինի ձերբակալել Պուտինին, եթե նա հայտնվի երկրում։ Ձերբակալման հրամանը դիվանագիտական երկընտրանք կլինի Պրետորիայի համար, որը Կրեմլի հետ մոտ հարաբերսություններ է ունեցել ապարտեիդի դեմ պայքարի դարաշրջանից սկսած:

Հարավային Աֆրիկան չի դատապարտել Ռուսաստանի ներխուժումն Ուկրաինա՝ հայտարարելով իր անաչառության մասին և պնդում է երկխոսության կարևորության հարցում։

Տաթև Ֆռանգյան