Մեզ խորթ է Սահմանադրությունը, պետություն չունենալուց է․ անարդա՛ր է պահանջել՝ միանգամից սահմանադրական երկիր լինենք․ Միքայել Հայրապետյան․ ՏԵՍԱՆՅՈՒԹ

Factor TV–ի հարցազրույցը հանրային գործիչ Միքայել Հայրապետյանի հետ

-Դուք սահմանադրագետ չեք, բայց Ձեր կարծիքով՝ արդյո՞ք Հայաստանը սահմանադրական պետություն է, և արդյո՞ք ՀՀ-ն ինքնիշխան, ժողովրդավարական, սոցիալական, իրավական պետություն է, ինչպես նշված է Հոդված 1-ում։

-Շատ լավ է գրված։ Իհարկե, մենք սահմանադրական պետություն ենք հռչակված, բայց միանգամից պահանջել, որ իրոք լինենք սահմանադրական պետություն, մի քիչ անարդար կլինի, որովհետև մենք 1000 տարի հետ ենք վարժված եղել զուտ պետություն գաղափարից, իսկ սահմանադրությունները պետությանը վայել գործիքներ են, պետության առհավատչյաներ են։

-Այսինքն՝ մեզ խո՞րթ է Սահմանադրությունը։

-Բավականին խորթ է։ Մի քանի շերտեր կան, նույնիսկ հոգեբանական։ Օրինակ՝ միջանձնային հարաբերություններում սահմաններ չենք ճանաչում՝ սոցիալական կայքերում, անգամ խորհրդարանում հայհոյում են միմյանց։ Այսինքն՝ մենք դեռ պիտի վարժվենք սահման ճանաչելուն։ Ես 1995 թվականին դեմ եմ քվեարկել մեր Սահմանադրությանը, բայց ամեն տարի իմ գաղափարակիցների և ուսանողների հետ քայլարշավ եմ կազմակերպել, ամբողջ գիշերն անցկացրել ենք Չարենցի կամարի մոտ՝ արևածագը դիմավորելով։ Թեև ես էլ եմ դեմ քվերակել, բայց դա է մեր Սահմանադրությունը՝ մեր «ծնողը», ասենք թե՝ չի գործում, պիտի հրաժարվե՞նք։ Եթե մայրդ հիվանդ լինի, պիտի հրաժարվե՞ս նրանից՝ ասելով՝ տանեմ թաղե՞մ, թե՞ ամեն ջանք գործադրես, որ բուժես նրան։

-Սահմանադրության օրվա կապակցությամբ Նիկոլ Փաշինյանի ուղերձում ՀՀ ինքնիշխանության մասին որևէ նշում չկար։ Ինչո՞ւ են մեր ղեկավարներն այդ բառից փորձում հեռավորություն պահել։

-Չեմ ընթերցել և չեմ լսել պարոն վարչապետի խոսքը, բայց եթե ասեմ, որ մերոնք խուսափում են ինքնիշխանությունից, անարդարամիտ կլինեմ։ Հիշենք՝ 2019-ին Պուտինի հետ հանդիպմանը Փաշինյանը հստակ ասաց՝ մենք պետք է հարգենք միմյանց ինքնիշխանությունը և անկախությունը, այդպիսի բան մեր նախկին ղեկավարները չէին ասել։ Հիմա այս մարդը պարտված երկրի առաջնորդ է։

-Այսինքն՝ իրավիճակ փոխվեց այս ընթացքում։

-Այո՛, և պարտվածի հոգեբանությունը մի քիչ այլ է։ Դրա համար ցանկալի կլիներ, որ պարտության բեռն իր վրա չկրող մի ուրիշ խումբ լիներ այսօր իշխանության, որը հստակ կշեշտեր ինքնիշխանություն, անկախություն, պետականություն, տարածքային ամբողջություն արտահայտությունները և այն, թե տարածքային երազանքներ ունե՞նք արդյոք։ Ինքնիշխանությունը մեզ խորթ չէ, մենք վարժվում ենք դրան։ Նիկոլ Փաշինյանի սերունդը տանուլ տվեց մեր սերնդի հաղթանակը, բայց այսօր պարտվել ենք, վաղը կարող ենք հաղթել։ Իսկ դրա համար պետք է ճշտենք, թե որն է մեր հոգու հայրենիքը։

Հարցազրույցն ամբողջությամբ՝ տեսանյութում։

Ռոբերտ Անանյան