16.01.2026 | 13:10
Կրկնակի օլիմպիական չեմպիոն Աբդուլռաշիդ Սադուլաևը պայմանագիր է կնքել RAF-ի հետ
Ադրբեջանի ԱԳՆ-ն արձագանքել է Նիկոլ Փաշինյանի ելույթին
Քաղաքականություն
29.06.2023 | 19:35
Ադրբեջանի ԱԳՆ-ն կրկին նյարդային է արձագանքել ՀՀ վարչապետ Նիկոլ Փաշինյանի՝ Կառավարության այսօրվա նիստում հնչեցրած հայտարարություններին։
Հիշեցնենք՝ Փաշինյանը հայտարարել էր, որ Ադրբեջանն իրադրությունը սրելու և ԼՂ-ն հայաթափելու հետևողական քաղաքականություն է վարում:
Բաքվի ԱԳՆ-ն կտրականապես հերքել է Նիկոլ Փաշինյանի հայտարարությունները, որ Ադրբեջանն Արցախում հայ բնակչության նկատմամբ էթնիկ զտումների քաղաքականություն է վարում և շրջափակման մեջ է պահում Արցախը։
«Այն, որ ադրբեջանական կողմի նշած սադրանքին ի պատասխան՝ հայկական զինուժի դեմ ձեռնարկվող միջոցառումները ներկայացվում են որպես էթնիկ զտումներ, անհեթեթ է»,- ասվում է հայտարարության մեջ։
Ի դեպ, ըստ Բաքվի՝ Արցախում որևէ հումանիտար ճգնաժամ և շրջափակում չկա։
«Հայկական կողմը պետք է զերծ մնա Ադրբեջանի ներքին գործերին միջամտելուց, հարգի Ադրբեջանի տարածքային ամբողջականությունն ու ինքնիշխանությունը՝ ոչ միայն խոսքով, դուրս բերի ադրբեջանական տարածքներից հայկական զինված ուժերը, որոնք վտանգ են ներկայացնում տարածաշրջանում խաղաղության և անվտանգության համար»,- ասվում է հայտարարության մեջ։
Հավելենք, որ ՀՀ-ն Զինված ուժեր չունի Ադրբեջանի տարածքում։
Էմմա Չոբանյան
