06.06.2026 | 14:11
Հայ շախմատիստների վերջնական արդյունքները կանանց ԵԱ-ում
Կրեմլը Սիրիայի, Մալիի և ԿԱՀ-ի իշխանություններին հայտնել է, որ «Վագներ»-ն իր հսկողության տակ է վերցրել․ WSJ
Քաղաքականություն
29.06.2023 | 16:12
Ռուսաստանի իշխանությունները որոշել են իրենց վերահսկողության տակ վերցնել արտերկրում գտնվող «Վագներ»-ի վարձկաններին։ Այս մասին հայտնում է The Wall Street Journal-ը, որին վկայակոչում է Meduza-ն։
Լրատվականի տեղեկություններով՝ Եվգենի Պրիգոժինի «արդարության երթի» ավարտի մասին հայտարարելուց մի քանի ժամ անց ՌԴ ԱԳ փոխնախարար Սերգեյ Վերիշինը մեկնել է Դամասկոս՝ Սիրիայի նախագահ Բաշար Ասադին անձամբ հայտնելու, որ «Վագներ»-ն այլևս ինքնուրույն չի գործելու այդ երկրում։ WSJ-ի աղբյուրը հայտնել է, որ վարձկաններին հրահանգվել է ժամանել Լաթաքիայի ռուսական բազա, և նրանք ենթարկվել են հրամանին։
Ըստ աղբյուրի՝ ՌԴ ԱԳՆ ներկայացուցիչները նաև հեռախոսազրույց են ունեցել Կենտրոնական Աֆրիկյան Հանրապետության ղեկավար Ֆոստեն Տուադերայի հետ, որի անձնական պաշտպանությամբ, ի թիվս այլ խնդիրների, զբաղվում է «Վագներ»-ը։ Ռուսական կողմը վստահեցրել է, որ Պրիգոժինի ապստամբությունը չի ազդի այդ երկրում «Վագներ»-ի աշխատանքի վրա։
Մալիի նախագահի անվտանգության հարցերով խորհրդական Ֆիդելե Գուանջիկան հրապարակավ հայտարարել է, որ «Վագներ»-ի հարցը Ռուսաստանի ներքին գործն է։
Մալիի ղեկավարությանը ՌԴ իշխանությունները ևս փորձել են համոզել, որ Պրիգոժինի ապստամբությունը որևէ կերպ չի անդրադառնա այդ երկրում «Վագներ»-ի աշխատանքի վրա։ WSJ-ն ուշադրություն է հրավիրում այն փաստի վրա, որ Պրիգոժինի ապստամբությունից հետո ԱԻՆ ինքնաթիռները Սիրիայից թռել են Մալի և հակառակ ուղղությամբ։ Թռիչքները, հավանաբար, կապված են եղել «Վագներ»-ի հետ, որի վարձկանները 2012 թվականից օգնում են կառավարությանը ապստամբների դեմ պայքարում:
Լրատվամիջոցը նշում է, որ ՌԴ-ից և Ուկրաիայից դուրս «Վագներ»-ի շուրջ 6,000 վարձկան կա, որոնք Աֆրիկայի և Մերձավոր Արևելքի երկրներում օգնում են Կրեմլին ամրապնդել իր ազդեցությունը։
Հիշեցնենք, որ «Վագներ»-ի զինյալները Եվգենի Պրիգոժինի գլխավորությամբ ապստամբություն էին սկսել, հունիսի 24-ի գիշերը մտել Դոնի Ռոստով, այնուհետև շարժվել դեպի Մոսկվա, բայց չէին հասել մայրաքաղաք։ Հունիսի 24-ի երեկոյան Պրիգոժինը հայտարարել էր, որ Բելառուսի նախագահ Ալեքսանդր Լուկաշենկոյի հետ բանակցություններից հետո «հետ են դարձնում իրենց շարասյուները» և «հեռանում են դաշտային ճամբարներ՝ պլանի համաձայն»։
Էմմա Չոբանյան
