Պուտինը թուլացած է․ Շոլցը՝ Պրիգոժինի ապստամբության մասին

Եվգենի Պրիգոժինի ապստամբությունը թուլացրել է ՌԴ նախագահ Վլադիմիր Պուտինին և երկարաժամկետ հետևանքներ կունենա նրա իշխանության համար։ ARD հեռուստաալիքին տված հարցազրույցում հայտարարել է Գերմանիայի կանցլեր Օլաֆ Շոլցը, գրում է DW-ի ռուսական ծառայությունը։

Նրա խոսքով՝ Գերմանիայի Դաշնային հետախուզական ծառայությունը (BND) նախապես չի իմացել նախապատրաստվող ապստամբության մասին։ Ինչ վերաբերում է ԶԼՄ-ների տեղեկություններին, որ ԱՄՆ հետախուզությունն իմացել է Պրիգոժինի ծրագրերի մասին, սակայն դրանք չի կիսել  բոլոր դաշնակիցների հետ, կանցլերը նշել է, որ կքննարկի այդ հարցը:

«Ամեն դեպքում, դա երկարաժամկետ հետևանքներ կունենա  Ռուսաստանի համար։ Ես հավատում եմ, որ Պուտինը թուլացած է»,- ասել է Շոլցը։

Ըստ նրա՝ ապստամբությունը ցույց է տվել, որ ավտորիտար կառույցներում, ուժային կառույցներում ճաքեր կան, և Պուտինն ամենևին էլ «այնքան ամուր չէ թամբի վրա, որքան բազմիցս հայտարարել է»։

«Բայց ես չեմ ուզում գուշակություններ անել, թե որքան ժամանակ է նա լինելու իշխանության։ Դա կարող է երկա՞ր տևել, թե՞ ոչ, մենք դա չգիտենք»,- ասել է Շոլցը։

Գերմանացի պաշտոնյան նաև հայտարարել է, որ «Վագներ» ռազմական խմբավորման վարձկանների հնարավոր տեղափոխումը Բելառուս ՆԱՏՕ-ի երկրներում մտահոգություն է առաջացնում։

«Սա մի իրավիճակ է, որին մենք մեծ մտահոգությամբ ենք նայում և ուշադիր ուսումնասիրում։ Ագրեսիվ բանակները վտանգ են ներկայացնում, իսկ մասնավոր բանակները՝ առավել ևս։ Որպես ՆԱՏՕ՝ մենք կարող ենք պաշտպանել մեր տարածքը»,- հավելել է Շոլցը՝ նշելով, որ «կապ չունեն Ռուսաստանում առճակատման հետ և Ուկրաինային իրենց աջակցության նպատակը ՌԴ-ում ռեժիմի փոփոխությունը չէ»։

Գերմանիայի կանցլերը նաև պատմել է, որ հունիսի 24-ին հեռախոսազրույցներ է ունեցել ոչ միայն ԱՄՆ նախագահ Ջո Բայդենի, Ֆրանսիայի նախագահ Էմանուել Մակրոնի և Մեծ Բրիտանիայի վարչապետ Ռիշի Սունակի, այլև Լեհաստանի վարչապետ Մատեուշ Մորավեցկիի հետ։

Էմմա Չոբանյան