16.01.2026 | 11:17
Ուկրաինան չի եղել և չի լինի խաղաղության խոչընդոտ. Զելենսկին արձագանքել է Թրամփին
Ադրբեջանի իշխանությունները պետք է վերացնեն ԼՂ-ի շրջափակումն ու վերջ տան հումանիտար ճգնաժամին․ Amnesty International
Քաղաքականություն
29.06.2023 | 12:33
Միջազգային իրավապաշտպան Amnesty International կազմակերպությունը թվիթերյան միկրոբլոգում անդրադարձել է Ադրբեջանի իշխանությունների կողմից Արցախի ապօրինի շրջափակմանն ու այնտեղ խորացող հումանիտար ճգնաժամին։
«Հունիսի 15-ին Ադրբեջանը դադարեցրել է բոլոր տեղաշարժերը Լաչինի միջանցքով, որը Լեռնային Ղարաբաղը Հայաստանին կապող միակ ճանապարհն է։ Տարածաշրջանը շրջափակման մեջ է 2022 թվականի դեկտեմբերից։ Լեռնային Ղարաբաղի բնակիչներն այդ ժամանակից ապավինում էին ռուսական խաղաղապահ ուժերի և Կարմիր խաչի մարդասիրական օգնությանը: Ադրբեջանցի զինվորներն այժմ արգելափակում են օգնության ավտոշարասյունների մուտքն ու ելքը, և հումանիտար ճգնաժամը խորանում է»,- ասվում է գրառման մեջ։
Նշվում է, որ հունիսի 26-ից Կարմիր խաչին թույլատրվել է վերսկսել ծանր հիվանդների տարհանումը։ Այնուամենայնիվ, հիվանդանոցները դեղերի և բժշկական պարագաների սուր պակաս ունեն։
Amnesty International-ը կոչ է անում Ադրբեջանին՝ վերացնել Արցախի շրջափակումը։
«Ադրբեջանի իշխանությունները պետք է վերացնեն Լեռնային Ղարաբաղի շրջափակումը և վերջ տան ծավալվող հումանիտար ճգնաժամին»,- ասվում է կազմակերպության հայտարարության մեջ։
Էմմա Չոբանյան
