14.08.2026 | 13:52
Էդգար Ղազարյանին համարժեք պատասխան կտանք. Վոլոդյա Հակոբյան․ ՏԵՍԱՆՅՈՒԹ
Արևմտյան հետախուզության պնդմամբ՝ Պրիգոժինը մտադիր է եղել Շոյգուին և Գերասիմովին գերի վերցնել․ WSJ
Քաղաքականություն
28.06.2023 | 21:22
Հունիսի 24-ին տեղի ունեցած զինված ապստամբության ժամանակ «Վագներ» մասնավոր ռազմական խմբավորման ղեկավար Եվգենի Պրիգոժինը մտադրված է եղել գերի վերցնել ՌԴ պաշտպանության նախարար Սերգեյ Շոյգուին և Գլխավոր շտաբի պետ Վալերի Գերասիմովին։ Այս մասին հայտնում է Wall Street Journal-ը, որին վկայակոչում է BBC-ի ռուսական ծառայությունը։
Այս վարկածի համաձայն՝ ի սկզբանե նախատեսվում էր երկուսին էլ գերեվարել Դոնի Ռոստովում արշավի ժամանակ, սակայն այս պլանի իրականացումից երկու օր առաջ ԱԴԾ-ն ինչ-որ կերպ իմացել է այդ մասին։
WSJ-ի տվյալներով՝ Պրիգոժինի պլանների մասին արևմտյան հետախույզներն իմացել են վաղ արբանյակային լուսանկարներից ու էլեկտրոնային հաղորդագրություններից։ Ըստ WSJ-ի աղբյուրների՝ Պրիգոժինի պլանը բավականին իրագործելի է եղել և ձախողվել է միայն այդ մասին տեղեկատվության արտահոսքից հետո, ինչը ստիպել է «Վագների» հիմնադրին իմպրովիզներ անել, քանի որ իմանալով այս արտահոսքի մասին՝ Պրիգոժինը ստիպված էր գործել նախատեսված ժամկետից ավելի շուտ։
«Վագների» կողմից այդքան հեշտությամբ Դոնի Ռոստովի գրավումը, ըստ հետախուզության պաշտոնյաների, վկայում է այն մասին, որ ռուսական կանոնավոր զորքերի առանձին հրամանատարներ կարող էին ներգրավված լինել դավադրության մեջ:
Հիշեցնենք, որ «Վագների» զինյալները Եվգենի Պրիգոժինի գլխավորությամբ ապստամբություն էին սկսել և հունիսի 24-ի գիշերը մտել Դոնի Ռոստով, այնուհետև շարժվել դեպի Մոսկվա, բայց չէին հասել մայրաքաղաք։ Հունիսի 24-ի երեկոյան Պրիգոժինը հայտարարել էր, որ Բելառուսի նախագահ Ալեքսանդր Լուկաշենկոյի հետ բանակցություններից հետո «հետ են դարձնում իրենց շարասյուները» և «հեռանում են դաշտային ճամբարներ՝ պլանի համաձայն»։
Ավելի ուշ հայտնի դարձավ, որ Պրիգոժինը մեկնելու է Բելառուս։ Նախօրեին Ալեքսանդր Լուկաշենկոն հաստատեց, որ Պրիգոժինն արդեն Բելառուսում է։
Էմմա Չոբանյան
