Կիևի ծրագրած հակահարձակման «գլխավոր իրադարձությունը» դեռ առջևում է․ բոլորն ամեն ինչ կտեսնեն․ Ռեզնիկով

Ուկրաինայի պաշտպանության նախարար Ալեքսի Ռեզնիկովը Financial Times-ին տված մեկնաբանությունում խոսել է ուկրաինական հակահարձակման, Ռուսաստանում Եվգենի Պրիգոժինի ապստամբության և այն մասին, թե դա ինչպես կարող է ազդել ռազմաճակատում իրավիճակի վրա:

Ռեզնիկովի խոսքով՝ վերջին շաբաթների ընթացքում Ռուսաստանի կողմից օկուպացված մի քանի գյուղերի ազատագրումը Կիևի ծրագրած հակահարձակման «գլխավոր իրադարձությունը» չէր։

«Երբ դա տեղի ունենա, դուք ամեն ինչ կտեսնեք։ Բոլորն ամեն ինչ կտեսնեն»,- հավելել է նա:

ՊՆ ղեկավարը հաստատել է, որ ուկրաինական զորքերի հիմնական ռեզերվները, այդ թվում՝ բրիգադների մեծ մասը, որոնք վերջերս վերապատրաստվել են Արևմուտքում և համալրված են ՆԱՏՕ-ի ժամանակակից տանկերով և զրահատեխնիկայով, դեռևս ներգրավված չեն գործողություններում։

Մեծ Բրիտանիայի Պաշտպանության նախարարության տվյալներով՝ ուկրաինական հակահարձակման արդյունքում մինչ այժմ Ռուսաստանից հետ է գրավվել մոտ 300 քառակուսի կիլոմետր տարածք, ինչը երկու անգամ ավելի է, քան պաշտոնապես հայտարարել է Կիևը, նշում է FT-ն։

Ռեզնիկովը պարբերականին տված հարցազրույցում նշել է, որ ուկրաինական բանակը շարունակում է մեծ կորուստներ պատճառել ռուսական զորքերին՝ «դեգրադացիան օգտագործելով որպես գործիք, իսկ ուկրաինական հողերի ազատագրումը՝ որպես նպատակ»։

Թեև «Վագներ»-ի հիմնադիր Եվգենի Պրիգոժինի ապստամբությունը դեռևս չի փոխել իրավիճակը մարտադաշտում, Ուկրաինայի պաշտպանության նախարարի խոսքով, այն դարձել է Ռուսաստանի խոցելիության «վառ ցուցադրություն»։

«Սա կօգնի Արևմուտքին հասկանալ, որ իրենք հենց այնպես ներդրումներ չեն անում Ուկրաինայում, որ Ուկրաինայի հաղթանակը բացարձակապես իրական է և սարերի հետևում չէ»,- ասել է Ռեզնիկովը։