Մակրոնն ու Ստոլտենբերգը կքննարկեն Մոսկվայի վրա «Պրիգոժինի արշավանքը»

ՆԱՏՕ-ի գլխավոր քարտուղար Յենս Ստոլտենբերգը, որն արդեն նախազգուշացրել է Մոսկվային և Մինսկին զերծ մնալ ցանկացած գործողությունից, որը սպառնում է Լեհաստանի, Լիտվայի և Լատվիայի անվտանգությանը՝ կապված Բելառուսում «վագներականների» ներկայության հետ, մեկնում է Ֆրանսիայի նախագահի հետ Էմանուել Մակրոնի հետ բանակցությունների, հայտնում է Euronews-ը։

Ելիսեյան պալատի ներկայացուցիչների խոսքով՝ հանդիպումը նախատեսված է եղել նախքան այն դրամատիկ իրադարձությունները, որոնք տեղի են ունեցել Ռուսաստանում հանգստյան օրերին։ Ի սկզբանե նախատեսվում էր քննարկել Վիլնյուսում հուլիսին կայանալիք ՆԱՏՕ-ի գագաթնաժողովի նախապատրաստական ​​աշխատանքները։ Այժմ, ակնհայտորեն, օրակարգը լինելու է Ռուսաստանի, ինչպես նաև Ուկրաինայում պատերազմի վրա ձախողված ապստամբության հետևանքների վերլուծությունը։

Հայտնի է, որ Ֆրանսիայի նախագահը հանգստյան օրերին հետևել է Ռուսաստանում տեղի ունեցող իրադարձություններին՝ կապ պահպանելով ամերիկացի, գերմանացի և բրիտանացի գործընկերների հետ։ Մակրոնի խոսքով՝ միջադեպը ցույց տվեց, որ ռուսական էլիտաներում պառակտում կա, ինչպես նաև բացահայտեց կանոնավոր բանակի և «օժանդակ ուժերի» խոցելիությունը, ինչպիսին «Վագներ» խումբն է։

Հիշեցնենք, որ «Վագների» զինյալները Եվգենի Պրիգոժինի գլխավորությամբ ապստամբություն էին սկսել և հունիսի 24-ի գիշերը մտել Դոնի Ռոստով, այնուհետև շարժվել դեպի Մոսկվա, բայց չէին հասել մայրաքաղաք։ Հունիսի 24-ի երեկոյան Պրիգոժինը հայտարարել էր, որ Բելառուսի նախագահ Ալեքսանդր Լուկաշենկոյի հետ բանակցություններից հետո «հետ են դարձնում իրենց շարասյուները» և «հեռանում են դաշտային ճամբարներ՝ պլանի համաձայն»։

Ավելի ուշ հայտնի դարձավ, որ Պրիգոժինը մեկնելու է Բելառուս։ Նախօրեին Ալեքսանդր Լուկաշենկոն հաստատեց, որ Պրիգոժինը արդեն Բելառուսում է։

Էմմա Չոբանյան