14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Չինաստանից որոշ գործարարներ դադարեցրել են ՌԴ մատակարարումները «Վագների» ապստամբության պատճառով
Քաղաքականություն
28.06.2023 | 14:02
Չինաստանից որոշ ձեռնարկատերեր դադարեցրել են Ռուսաստան ապրանքների մատակարարումներն ապստամբության պատճառով, որը կազմակերպել էր ռուսական «Վագներ» ռազմական խմբավորման ղեկավար Եվգենի Պրիգոժինը։ Այս մասին հայտնում է Reuters-ը՝ վկայակոչելով գործարարներին, փոխանցում է Meduza-ն։
«Մենք կարծում էինք, որ մեծ խնդիրներ կառաջանան»,- ասել է Ֆուցզյան նահանգից առևտրային կազմակերպության ղեկավար Շեն Մուհեյը, որը միավորում է մի շարք ընկերություններ։ Դրանք մեքենաներ, պահեստամասեր և հագուստ են արտահանում Ռուսաստան:
Մուհեյը նշել է, որ չնայած Ռուսաստանում ճգնաժամը թուլացել է, որոշ ձեռնարկատերեր որոշել են սպասել, քանի որ չգիտեն՝ ինչ է լինելու հետագայում։ Նա հրաժարվել է անվանել ընկերությունների անունները, որոնք դադարեցրել են մատակարարումները։
Չինաստանի ԱԳՆ-ն չի պատասխանել հարցի շուրջ մեկնաբանություն ստանալու՝ Reuters-ի դիմումներին։
Հիշեցնենք, որ «Վագների» զինյալները Եվգենի Պրիգոժինի գլխավորությամբ ապստամբություն էին սկսել և հունիսի 24-ի գիշերը մտել Դոնի Ռոստով, այնուհետև շարժվել դեպի Մոսկվա, բայց չէին հասել մայրաքաղաք։ Հունիսի 24-ի երեկոյան Պրիգոժինը հայտարարել էր, որ Բելառուսի նախագահ Ալեքսանդր Լուկաշենկոյի հետ բանակցություններից հետո «հետ են դարձնում իրենց շարասյուները» և «հեռանում են դաշտային ճամբարներ՝ պլանի համաձայն»։
Չստացված ապստամբությունից հետո Չինաստանի ԱԳՆ-ն հայտարարել էր, որ դա Ռուսաստանի «ներքին գործն է», և աջակցել էր Մոսկվայի ջանքերին՝ ուղղված իրավիճակի կայունացմանը։
Էմմա Չոբանյան
