Պուտինի կարճ ուղերձը զինվորականներին ավարտվել է օրհներգով և թնդանոթային կրակով

Ռուսաստանի նախագահ Վլադիմիր Պուտինը, ինչպես նախօրեին, սահմանափակվել է կարճ ելույթով, որում շնորհակալություն է հայտնել զինվորականներին և խոսել Եվգենի Պրիգոժինի ապստամբությունը հաջողությամբ ճնշելու մասին, գրում է BBC-ի ռուսական ծառայությունը։

«Այսօր այստեղ՝ Մոսկվայի Կրեմլի պատմական Սոբորնայա հրապարակում են ՌԴ ԶՈւ զինծառայողները, Ռոսգվարդիայի, Անվտանգության դաշնային ծառայության, ՆԳՆ-ի աշխատակիցները, զինվորներն ու սպաները՝ Հայրենիքի իսկական պաշտպանները, որոնք երկրի համար դժվարին պահին իրենց մարտական ընկերների հետ կանգնեցին խառնաշփոթի ճանապարհին, ինչի հետևանքով անխուսափելիորեն քաոս կտիրեր»,- ասել է Պուտինը։

Նա հավելել է, որ անվտանգության ուժերը շաբաթավերջին «փաստացիորեն կանգնեցրել են քաղաքացիական պատերազմը»:

«Դժվար իրավիճակում դուք գործեցիք հստակ, ներդաշնակ, գործով ապացուցեցիք ձեր հավատարմությունը Ռուսաստանի ժողովրդին և զինվորական երդումով, պատասխանատվություն դրսևորեցիք հայրենիքի և նրա ապագայի, ճակատագրի հանդեպ»,- Պուտինի խոսքերն են մեջբերում Կրեմլի Telegram-ալիքները։

Պուտինը չի հստակեցրել, թե կոնկրետ ինչ հստակ և համահունչ գործողությունների մասին է խոսքը, քանի որ Պրիգոժինի ռազմական խմբավորումն ամբողջ շաբաթ օրը վերահսկում էր Դոնի Ռոստովի կենտրոնը և առաջ շարժվում դեպի Մոսկվա։
Ելույթի ընթացքում նա մեկ րոպե լռությամբ առաջարկել է հարգել «Վագների» վարձկանների ապստամբության ժամանակ զոհված օդաչուների հիշատակը։

Արարողությանը մասնակցել է նաև պաշտպանության նախարար Սերգեյ Շոյգուն։ Արդեն մի քանի օր է՝ ռազմականամետ Telegram ալիքներում հաղորդագրություններ են շրջանառվում, որ Շոյգուն կարող է կորցնել պաշտոնը։ Նախարարի հրաժարականը պահանջել էր Պրիգոժինը։

Տաթև Ֆռանգյան