27.06.2026 | 01:34
5.5 մլրդ դոլար. աշխարհի ամենաթանկ ստադիոնում ԱՄՆ-Թուրքիա հանդիպման ետնաբեմը Factor TV-ի թղթակցի աչքերով
ՌԴ ԱԴԾ-ն կարճել է «Վագներ»-ի ապստամբության փաստով հարուցված քրեական գործը
Քաղաքականություն
27.06.2023 | 13:28
Ռուսաստանի Անվտանգության դաշնային ծառայությունը փակել է զինված ապստամբության փաստի առթիվ հարուցված քրեական գործը։ Այս մասին հայտնում են ՌԴ հատուկ ծառայությունների հասարակայնության հետ կապերի կենտրոնից։
«Ապստամբության գործը քննելիս պարզվել է, որ դրա մասնակիցները դադարեցրել են ուղղակի հանցագործությանն ուղղված գործողությունները, գործը կարճվել է»,- ՌԻԱ Նովոստիի փոխանցմամբ՝ ասվում է հայտարարության մեջ։
Այն, որ «Վագների» հիմնադիր Եվգենի Պրիգոժինի դեմ գործը կարճվելու է, շաբաթ երեկոյան հայտարարել էր Կրեմլի խոսնակ Դմիտրի Պեսկովը։
Այն ժամանակ նրա մեկնաբանությունը հնչել էր Բելառուսի նախագահ Ալեքսանդր Լուկաշենկոյի մասնակցությամբ ձեռք բերված գործարքի վերաբերյալ հանդիպումների ֆոնին։ Ըստ այդմ՝ Պրիգոժինը համաձայնել էր դադարեցնել տեղաշարժը դեպի Մոսկվա և իր զորքերը տանել Ուկրաինայի օկուպացված տարածքներում գտնվող իր դաշտային ճամբարներ։
Ինքը՝ Պրիգոժինը, պետք է մեկնի Բելառուս, ասել էր Պեսկովը։ Թե որտեղ է նա այժմ, հայտնի չէ։ Երեքշաբթի առավոտյան «Беларускі Гаюн» մոնիթորինգային նախագիծը հայտնել է, որ «Վագների» հիմնադրի անձնական ինքնաթիռը, հնարավոր է, վայրէջք է կատարել Մինսկի ռազմական օդանավակայանում։
Հունիսի 26-ի դրությամբ՝ քրեական գործը դեռևս նախաքննության փուլում էր, հայտնում են ռուսական լրատվամիջոցները։
Տաթև Ֆռանգյան
