07.10.2026 | 23:48
Արթուր Դանիելյանը կալանավորվեց
ԱՄՆ-ն ազդակներ չի տեսնում, որ ՌԴ-ն մտադիր է Ուկրաինայում միջուկային սպառազինություն կիրառել
Քաղաքականություն
27.06.2023 | 11:57
ԱՄՆ իշխանությունները ազդակներ չեն տեսնում, որ Ռուսաստանը մտադիր է միջուկային զենք կիրառել Ուկրաինայում։ Այս մասին հայտարարել է Սպիտակ տան Ազգային անվտանգության խորհրդի ռազմավարական հաղորդակցությունների համակարգող Ջոն Քիրբին, գրում է DW-ի ռուսական ծառայությունը։
Նա նշել է, որ Վաշինգտոնը նաև չի տեսնում Զապորոժիեի ԱԷԿ-ի պայթեցման վտանգ, սակայն ուշադիր հետևում են ատոմակայանի շուրջ ստեղծված իրավիճակին։
«Չնայած բուռն հռետորաբանությանը, մենք չենք տեսել որևէ ազդակ, որ Ռուսաստանն ունի Ուկրաինայի տարածքում միջուկային զենք կիրառելու մտադրություն։ Եվ ես կարող եմ ձեզ վստահեցնել, որ մենք չենք տեսել որևէ բան, որը կստիպի մեզ փոխել մեր սեփական ռազմավարական զսպման դիրքորոշումը»,- լրագրողներին ասել է Քիրբին։
Մեկնաբանելով ուկրաինացի պաշտոնյաների հայտարարությունները Զապորոժիեի ԱԷԿ-ի Ռուսաստանի կողմից հավանական պայթեցման նախապատրաստության մասին՝ Սպիտակ տան ներկայացուցիչն ասել է, որ Միացյալ Նահանգները «ոչ մի նշան չի տեսնում, որ այդ սպառնալիքը մոտ է»: «Բայց մենք շատ, շատ ուշադիր հետևում ենք իրավիճակին», – հավելել է Քիրբին:
Հիշեցնենք, որ Ուկրաինայի նախագահ Վլադիմիր Զելենսկին ավելի վաղ հայտարարել էր, որ Ռուսաստանը դիտարկում է Զապորոժիեի ատոմակայանում ռադիացիայի արտանետմամբ ահաբեկչական գործողության սցենարը։
