14.09.2026 | 14:24
Վանաձորի Հրանտ Մաթևոսյանի անվան այգու 13-րդ հողատարածքը վերադարձվել է համայնքին
ՌԴ-ում գիտնականին 12 տարվա ազատազրկման են դատապարտել՝ «պետական դավաճանության» համար
Քաղաքականություն
26.06.2023 | 22:04
Մոսկվայի քաղաքային դատարանը 12 տարի ժամկետով խիստ ռեժիմի գաղութում ազատազրկման է դատապարտել Մոսկվայի ֆիզիկատեխնիկական ինստիտուտի 71-ամյա պրոֆեսոր Վալերի Գոլուբկինին, որը մեղադրվում է պետական դավաճանության համար։ Նման դատավճիռ է պահանջել մեղադրող դատախազը։
BBC-ի ռուսական ծառայության փոխանցմամբ՝ Գոլուբկինը Մոսկվայի ֆիզիկատեխնիկական ինստիտուտի պրոֆեսոր է, տեխնիկական գիտությունների դոկտոր, Կենտրոնական աերոհիդրոդինամիկական ինստիտուտի առաջատար գիտաշխատող, գերձայնային ինքնաթիռների նախագծման վերաբերյալ գիտական աշխատությունների հեղինակ։
Գիտնականին մեղադրանք է առաջադրվել գերձայնային քաղաքացիական ինքնաթիռի վրա աշխատանքի մասին հաշվետվությունները արտասահմանում ներկայացնելու համար։ Նրան մեղադրել են պետական դավաճանության մեջ 2021 թվականին, այդ ժամանակից նա կալանքի տակ է։
Ձերբակալությունից վեց ամիս անց գիտնականը բանտից նամակ էր գրել, որում ասում էր, որ իր դեմ գործ է հարուցվել արագընթաց մարդատար ինքնաթիռի ստեղծման միջազգային նախագծին մասնակցելու պատճառով, որի աշխատանքային պլանը հաստատվել է Արդյունաբերության և առևտրի նախարարության կողմից։ Գոլուբկինը պնդում է իր անմեղության հարցում։
Փաստաբան Ալեքսանդր Տիմոշենկոն BBC-ին ասել է, որ գիտնականը նույնիսկ պետական գաղտնիքներին հասանելիություն չի ունեցել։
«Նա տեսական ֆիզիկոս է, նա ինձ բացատրել է, թե տեսական ֆիզիկայի ինչ հարցերով է զբաղվում: Նա պետական գաղտնիքներին հասանելիություն չուներ»,- ասել է նա։
Փաստաբան Մարիա Էյսմոնտը հայտնել է, որ պաշտպանական կողմը կբողոքարկի դատավճիռը:
Տաթև Ֆռանգյան
