02.11.2024 | 20:53
Բացվեց «Լույսեր» բնակելի համալիրը՝ կանաչապատ բակերով և նորարար լուծումներով. ՏԵՍԱՆՅՈՒԹ
Ադրբեջանի ՊՆ ղեկավարը խոսել է նոր հրթիռների ձեռքբերման, Թուրքիայից ԱԹՍ-ների գնման և համատեղ արտադրության ծրագրերի մասին
Քաղաքականություն
26.06.2023 | 20:19
Ադրբեջանը նոր հրթիռային համակարգեր է գնում նոր առաջադրանքների լուծման համար։ Այս մասին ադրբեջանական CBC հեռուստալիքին տված հարցազրույցում հայտարարել է Ադրբեջանի ՊՆ ղեկավար Զաքիր Հասանովը։
«Ի լրումն այն հրթիռների, որոնք մենք ունենք, մենք համալրել ենք դրանց պաշարները պատերազմի ավարտից հետո, կա նաև որոշ հրթիռների արդիականացում, քանի որ որոշները ռազմական գործողությունների ժամանակ խնդիրներ ունեցան հակառակորդի ռադիոէլեկտրոնային համակարգերի հետ կապված։ Ընթացքի մեջ է նաև նոր հրթիռային համակարգերի գնումը, որոնք մեզ տալիս են բանակի առջև ծառացած նոր խնդիրների և Ադրբեջանի դեմ հնչող սպառնալիքների լուծումը»,-ասել է Հասանովը։
Հիշեցնենք՝ օրերս էլ Ադրբեջանի նախագահի Իլհամ Ալիևն էր հայտարարել, որ կնքվել են հեռահար հրթիռների մատակարարման պայմանագրեր։
Հասանովը նաև նշել է, որ Թուրքիայի զինված ուժերի մոդելով բանակի զարգացման աշխատանքների 70 տոկոսն իրականացվել է։ Նա հավելել է, որ այս տարի Թուրքիայի զինված ուժերի հետ միասին նախատեսվում է անցկացնել ԶՈՒ բոլոր ճյուղերի 16 համատեղ զորավարժություն, որից 6-ն արդեն անցկացվել են։
Ադրբեջանի ՊՆ ղեկավարը նաև հայտնել է, որ Թուրքիայի հետ ծրագրվում է համատեղ նախագիծ, որը ենթադրում է ոչ միայն Անկարայից նոր անօդաչու թռչող սարքերի ձեռքբերում, այլև դրանց համատեղ արտադրություն և շահագործում Ադրբեջանում։
«Այդ հարցերն արդեն լուծվում են, և մեր հանրությունը մոտ ապագայում կտեղեկացվի։ Որոշումն արդեն ընդունված է»,-հայտարարել է Հասանովը։
Էմմա Չոբանյան
