15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
ԵՄ-ն 3,5 միլիարդ եվրոյով ավելացնում է Կիևին տրամադրվող ռազմական օգնությունը
Քաղաքականություն
26.06.2023 | 16:56
Եվրոպական խորհուրդը որոշել է բարձրացնել Խաղաղության եվրոպական հիմնադրամի ընդհանուր ֆինանսական վերին շեմը 3,5 միլիարդ եվրոյով՝ հասցնելով ավելի քան 12 միլիարդ եվրոյի, որից ֆինանսավորվում է Ուկրաինային ռազմական օգնությունը։ Այս մասին հաղորդվում է Եվրոպական խորհրդի կայքում։
Ըստ ԵՄ արտաքին գործերի և անվտանգության քաղաքականության գերագույն ներկայացուցիչ Ժոզեպ Բորելի՝ սա Խաղաղության եվրոպական հիմնադրամի ֆինանսավորման երկրորդ ավելացումն է 2021 թվականին դրա ստեղծման օրից:
«Երկու տարուց պակաս ժամանակում հիմնադրամն ապացուցել է իր արդյունավետությունը: Սա ամբողջությամբ փոխել է այն, թե ինչպես ենք մենք աջակցում մեր պաշտպանական գործընկերներին»,- ասել է նա:
Խաղաղության եվրոպական հիմնադրամը ստեղծվել է 2021 թվականի մարտին՝ ֆինանսավորելու ընդհանուր արտաքին և անվտանգության քաղաքականության բոլոր գործողությունները կապված ռազմական և պաշտպանական հարցերի հետ՝ հակամարտությունների կանխարգելման, խաղաղության պահպանման և միջազգային անվտանգության ու կայունության ամրապնդման նպատակով։
Մասնավորապես, Խաղաղության եվրոպական հիմնադրամը թույլ է տալիս ԵՄ-ին ֆինանսավորել գործողություններ, որոնք ուղղված են ԵՄ անդամ չհանդիսացող երկրների, ինչպես նաև տարածաշրջանային և միջազգային կազմակերպությունների կարողությունների հզորացմանը ռազմական և պաշտպանական հարցերում:
Հիմնադրամն արտաբյուջետային գործիք է։ Այն ստեղծվել է 2021-2027 թվականների համար 5,5 միլիարդ եվրո ընդհանուր ֆինանսական վերին շեմով, որն ավելացել է 2 միլիարդ եվրոյի առաջին համալրմամբ մինչև գրեթե 8 միլիարդ եվրո՝ 2023 թվականի մարտի 13-ից: Անդամ պետությունների մուծումները որոշվում են համախառն ազգային եկամտի բաշխման հիման վրա:
Տաթև Ֆռանգյան
