Պրիգոժինի ապստամբությունից հետո հարևան երկրներն ամրապնդում են ՌԴ-ի և Բելառուսի հետ սահմանները

Բելառուսի հարևանները վերանայում են սահմանային անվտանգության միջոցառումներն այն բանից հետո, երբ հայտնի դարձավ, որ ռուսական «Վագներ» մասնավոր ռազմական ընկերության ղեկավար Եվգենի Պրիգոժինը Ռուսաստանում ապստամբությունից հետո ուղարկվելու է այս երկիր, գրում  է Euronews-ը։

Մասնավորապես, Լեհաստանի վարչապետն ու պաշտպանության նախարարը ստուգել են զորքերը երկրի հյուսիս-արևելքում՝ Կալինինգրադի մարզի և Բելառուսի հետ սահմանի մոտ։

«Մենք ամրացրել ենք Բելառուսի և Կալինինգրադի մարզի հետ սահմանները։ Տեղյակ ենք սպառնալիքների մասին և պատասխանում ենք հարձակումների կանխատեսմամբ: Ի վերջո, մենք արդեն երկու տարի է՝ գործ ունենք լեհական սահմանին հիբրիդային հարձակման հետ։ Լեհական բանակի զինվորները ծառայում են սահմանին՝ դրանով իսկ ամրապնդելով մեր հայրենիքի անվտանգությունը»,- ասել է Լեհաստանի ՊՆ ղեկավար Մարիուշ Բլաշչակը։

Լիտվայի նախագահ Գիտանաս Նաուսեդան էլ հայտարարել է, որ ՆԱՏՕ-ն պետք է «ուժեղացնի» իր արևելյան թևը, եթե Բելառուսը ցանկանա ապաստան տալ Եվգենի Պրիգոժինին և նրա զորքերին:

ՆԱՏՕ-ի նոր անդամ Ֆինլանդիան նույնպես հետևում է իրավիճակին։

«Իրավիճակը նուրբ է, ամեն ինչ կարող է պատահել։ Մենք շարունակում ենք շատ ուշադիր հետևել իրավիճակին»,- ասել է Ֆինլանդիայի ԱԳ նախարար Էլինա Վալտոնենը։

Հիշեցնենք, որ «Վագների» զինյալներն ապստամբություն էին սկսել և հունիսի 24-ի գիշերը մտել Դոնի Ռոստով, այնուհետև շարժվել դեպի Մոսկվա, բայց չեն հասել մայրաքաղաք։ Հունիսի 24-ի երեկոյան «Վագների» ղեկավար Եվգենի Պրիգոժինը հայտարարել էր, որ Բելառուսի նախագահ Ալեքսանդր Լուկաշենկոյի հետ բանակցություններից հետո «հետ են դարձնում իրենց շարասյուները» և «հեռանում են դաշտային ճամբարներ՝ պլանի համաձայն»։ Ավելի ուշ հայտնի դարձավ, որ Պրիգոժինը մեկնելու է Բելառուս։

Էմմա Չոբանյան