ԱՄՆ առափնյա պահպանությունը հետաքննում է «Տիտան» բատիսկաֆի խորտակումը

ԱՄՆ առափնյա պահպանության ծառայությունը սեփական հետաքննությունն է անցկացնում՝ կապված խորտակված «Տիտանիկի» մոտ սուզվող «Տիտան» բատիսկաֆի վթարի հետևանքով հինգ մարդու մահվան հետ։ Այս մասին հայտարարել է գերատեսչության գլխավոր քննիչ Ջեյսոն Նոյբաուերը՝ ելույթ ունենալով Բոստոնում կայացած մամուլի ասուլիսում, փոխանցում է DW-ի ռուսական ծառայությունը։

Ըստ Նոյբաուերի՝ վարչությունն այժմ ապացույցներ է հավաքում՝ փնտրում է բատիսկաֆի նոր բեկորներ Ատլանտյան օվկիանոսի հյուսիս-արևմուտքում: Բացի այդ, քննիչները վկաներին հարցաքննում են կանադական Սենթ Ջոն նավահանգստում, ուր վերադարձել էր Polar Prince նավը՝ «Տիտան»-ը հասցնելով սուզվելու վայր:

Նոյբաուերը նշել է, որ իր ղեկավարած հետաքննության հիմնական խնդիրն ապագայում նմանատիպ վթարները կանխելու համար առաջարկությունների ցանկի կազմումն է։

Այնուամենայնիվ, անհրաժեշտության դեպքում, ԱՄՆ առափնյա պահպանության ծառայությունը կարող է իրավապահ մարմիններին առաջարկել քրեական կամ վարչական վարույթ հարուցել:

Հիշեցնենք՝ բատիսկաֆը սկսել էր սուզվել, սակայն առաքելության մեկնարկից 1 ժամ 45 րոպե անց կորցրել էր կապն արտաքին աշխարհի հետ։ Բեկորների վիճակը վկայում է լուրջ աղետի մասին, սակայն պատճառն առայժմ անհայտ է։ Հայտնի չէ նաև մահացածների մարմինների գտվելու վայրը։

Բատիսկաֆում հինգ մարդ է եղել՝ 58-ամյա բրիտանացի գործարար և հետազոտող Համիշ Հարդինգը, 48-ամյա պակիստանցի գործարար Շահզադա Դավուդը և նրա 19-ամյա որդի Սուլմանը, 61-ամյա Սթոքթոն Ռաշը՝ Ocean Gate-ի տնօրենը և 77-ամյա ֆրանսիացի հետազոտող Պոլ Անրի Նարջոլեն։

Տաթև Ֆռանգյան