Բարձրագույն կրթություն չունեցող ուսուցիչները կա՛մ կատեստավորվեն, կա՛մ այլևս չեն աշխատի դպրոցներում․ ՏԵՍԱՆՅՈՒԹ

Համակարգում դեռևս մնացել են 1300-ից մի փոքր ավելի ուսուցիչներ, որոնք միջին մասնագիտական կրթություն ունեն, բայց շարունակում են աշխատել դպրոցներում: Այս անձինք այլևս չեն կարողանալու աշխատել դպրոցներում՝ այս տարվա օգոստոսի 20-ից սկսած: Այս մասին Կառավարության առաջարկով ԱԺ-ում գումարված արտահերթ նստաշրջանի ժամանակ «ՀՀանրակրթության մասին» օրենքում փոփոխություններ և լրացումներ կատարելու մասին» օրենքի նախագիծը ներկայացնելիս հայտարարեց ԿԳՄՍ նախարար Ժաննա Անդրեասյանը։

Պարզաբանելով, թե ինչով է պայմանավորված նախագծի ընդունման հրատապությունը՝ նախարարը նշեց․ «Շուրջ 12 տարի առաջ «Հանրակրթության մասին» ՀՀ օրենքով պետությունը ուսուցիչների համար սահմանել է պահանջ, որ վերջիններս ունենան պարտադիր բարձրագույն կրթություն, և տվել է որոշակի ժամանակ դպրոցներում գործող ուսուցիչներին այն պարագայում, եթե վերջիններս չունեին բարձրագույն կրթություն, սովորել և ձեռք բերել բարձրագույն կրթական աստիճան:

Հաշվի առնելով այն հանգամանքը, որ այս ուսուցիչների պարագայում գործել են տարբեր, այդ թվում՝ օբյեկտիվ հանգամանքներ բարձրագույն կրթություն չստանալու տեսանկյունից, առաջարկվում է, որպեսզի նրանց ընձեռենք հնարավորություն՝ մասնակցելու կամավոր ատեստավորման գործընթացին, և եթե կամավոր ատեստավորման գործընթացն այս ուսուցիչներն անցնեն հաջողությամբ, այսինքն՝ հավաքեն 60 տոկոս և ավելին, ապա նրանց տրվի հնարավորություն՝ շարունակելու իրենց ուսուցչական գործունեությունը: Եվ ինչպես նշեցի` այս ժամկետն արդեն մոտենում է, հետևաբար օրենսդրական կարգավորման հրատապության խնդիր ունեինք, որպեսզի կարողանայինք հավելյալ հնարավորություն ընձեռել ուսուցիչներին»։

Անդրեասյանը նաև տեղեկացրեց, որ ուսուցիչների ատեստավորման գործընթացը շարունակվում է: Հաջորդ փուլը աշնանն է լինելու:

Նախագծով առաջարկվում է նաև ուսուցիչների թափուր տեղերը համալրելու մեխանիզմ, այն է՝ ուսուցիչների գործուղման հնարավորությունը մարզային ուսումնական հաստատություններ:

Նախարարի խոսքով՝ նախագծի շրջանակում մանկավարժի որակավորում ստանալու ծրագրում սովորող ուսանողներին ևս կրթության վերջին տարում հնարավորություն կտրվի դասավանդել գյուղական դպրոցներում մենթոր-ուսուցչի ուղեկցությամբ։

Մանրամասները՝ տեսանյութում։