Կալուգայի ու Տուլայի մարզերում ՆԳՆ ստորաբաժանումները բարձրացվել են ահազանգով․ BBC

ՌԴ Կալուգայի ու Տուլայի մարզում BBC-ի աղբյուրները հայտնում են, որ մարզի ՆԳՆ զինված ստորաբաժանումները ահազանգով բարձրացվել են։ Ըստ այդ տեղեկությունների՝ մարզերի ՆԳՆ ղեկավարությունը անձնակազմին տեղեկացրել է, որ նրանց հրամայվել է ծառայողական մեքենաներով, շարասյունով շարժվել դեպի Մոսկվա։ Ոչ մի մանրամասն նրանց չի ներկայացվել։

Հիշեցնենք, որ հունիսի 23-ին Վագների հիմնադիր Եվգենի Պրիգոժինը փաստացի հայտարարել է Ռուսաստանում ռազմական հեղաշրջման մասին։ Նրան ենթակա վարձկանների ջոկատները պատրաստվում են «արդարության երթ» կազմակերպել։ Ռուսաստանի մարզկենտրոններից մեկը՝ Դոնի Ռոստովը, գրավել են «Վագների» վարձկանները։ Քաղաքի փողոցներում տանկեր կան։ Զինված մարդիկ շրջափակել են Հարավային ռազմական օկրուգի շտաբը, քաղաքային վարչությունը, ԱԴԾ-ի և ՆԳՆ վարչությունները։ Պրիգոժինը ուղերձ է տեսագրել Դոնի Ռոստովում՝ Հարավային ռազմական օկրուգի շտաբում։ Նա այնտեղ հանդիպել է ՌԴ պաշտպանության փոխնախարար Յունուս-Բեկ Եվկուրովի և Գլխավոր շտաբի պետի տեղակալ Վլադիմիր Ալեքսեևի հետ։ «Մենք արգելափակում ենք Ռոստովը և գնում ենք Մոսկվա», – ասել է Պրիգոժինը:

ԱԴԾ-ի կենտրոնական ապարատին մոտ կանգնած BBC-ի աղբյուրների տվյալներով էլ «Վագները» գրավել է նաև Վորոնեժի «բոլոր գլխավոր օբյեկտները»։
ՌԴ նախագահ Վլադիմիր Պուտինը ուղերձով դիմել է զինվորականներին, ուժային գերատեսչություններին։ «Վագներ» ռազմականացված խմբավորման գործողությունները նա անվանել է «հարված մեջքին» ու համեմատել է 1917 թ հոկտեմբերի իրավիճակի «դավաճանության» հետ ու հայտարարել, որ ՌԴ զինված ուժերը հրաման են ստացել «չեզոքացնել զինված ապստամբությունը կազմակերպողներին», «վճռական գործողություններ կձեռնարկվեն, դրանք կլինեն կոշտ»։